Агриппина Шин мактабгача ва мактаб таълими вазирининг 1-ўринбосари — Мактабгача таълим агентлиги директори этиб тайинланди.
Шин 2017 йилдан Ўзбекистон Республикаси мактабгача таълим вазири лавозимида фаолият юритиб келаётганди. 2015—2019 йиллар оралиғида Олий Мажлис Сенати аъзоси бўлган.
Эслатиб ўтамиз, 2023 йил 31 январь куни мактабгача ва мактаб таълими вазирига ўринбосарлар тайинланганди. Халқ таълими вазирининг биринчи ўринбосари лавозимида ишлаган Усмон Шарифхўжаев мактабгача ва мактаб таълими вазири биринчи ўринбосари бўлган.
Темуржон Комилов, Дилшод Кенжаев, Узоқбой Бегимқулов мактабгача ва мактаб таълими вазири ўринбосарлари этиб тайинланган. Тайинловга қадар Темуржон Комилов халқ таълими вазири ўринбосари лавозимида, Дилшод Кенжаев президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси ўринбосари лавозимида, Узоқбой Бегимқулов олий ва ўрта махсус таълим вазирининг фан ва инновациялар бўйича ўринбосари лавозимида ишлаб келган.
Изоҳ (0)