Фарзанд кутаётган ўзбек шоу-бизнеси вакиллари

Ўзбек шоу-бизнес оламининг бир нечта вакиллари тез орада она бўлишади. Улар ҳомиладор бўлса-да, халқ хизматини чеклаётгани ва ижодий танаффус қилаётгани йўқ.

Ҳулкар Абдуллаева

Ҳамиша ОАВ эътиборидан четда юришга ҳаракат қиладиган хонанда Ҳулкар Абдуллаева 40 ёшида она бўлишни режа қилган кўринади. У гарчи бошқа ижодкорлар сингари ҳомиладор эканлигини маълум қилмаган бўлса-да, мухлислар аллақачон бу янгиликдан хабар топишди.
Эслатиб ўтамиз, хонанданинг икки қиз фарзанди бор.  

Шаҳло Зоирова

Кейинги пайтларда саҳнадан бироз чекинган, аммо халқ хизматларида фаолликни ўз қўлига олган Шаҳло Зоирова ҳам яқин кунларда она бўлади. Унинг бир қиз ва икки ўғил фарзанди бор.
— Бахтли аёл қайта ва қайта она бўлгиси келаверади. Ўғилларим бир-бирига елкадош. Насиб қилса, қизимга ҳам шерик олиб келиш ниятидаман, — дейди актриса.

Камола Ортиқова

“Уммон” гуруҳи хонандаси Зоҳид Рисқиевнинг турмуш ўртоғи Камола Ортиқова ҳам яқин кунларда она бўлади. Афсуски, унинг ҳомиладорлик пайти сокин ва беташвиш ўтгани йўқ. Турмуш ўртоғининг автофалокатга учрагани ва унинг ортидан келган муаммолар сабаб, Камола Ортиқова кўплаб қийинчиликларни бошдан ўтказди. 
— Насиб қилса, илк фарзандимизни дадасининг ўзи билан туғуруқхонадан олиб чиқамиз, — дея Instagram саҳифасида ёзиб қолдирган Камола Ортиқова.

Мадина Мумтоз

Санъатни тарк этиб, фудблогерлик фаолиятини бошлаган Мадина Мумтоз ҳам тез кунларда тўртинчи бор она бўлади. Бу йил 32 ёшни қаршилайдиган собиқ актрисанинг уч ўғил фарзанди бор.