Сурхондарё вилояти Бойсун туманида ЙПХ инспекторига пора беришга уринган қоидабузар ҳайдовчига нисбатан жиноят иши қўзғатилди. Бу ҳақда ИИВ ЙҲХХ ахборот хизмати хабар берди.
Қайд этилишича, 14 март куни Бойсун туманида хизмат олиб бораётган вилоят ИИБ ЖХХ ЙҲХБ инспектори Комилов томонидан Nexia автомобили тўхтатилган. Текширув давомида Қарши шаҳрида яшовчи фуқаро мазкур транспорт воситасини ишончномасиз бошқариб келаётгани маълум бўлган.
Ҳолат юзасидан маъмурий баённома расмийлаштирилиб, автомашина вақтинча сақлаш жарима майдонига жойлаштирилган.
Шундан сўнг қоидабузар ҳайдовчи ЙПХ ходимига машинани жарима майдонидан чиқариб бериши ва ўзига нисбатан тузилган маъмурий баённомани бекор қилдириши учун 1,5 миллион сўм пора таклиф қилган.
ЙПХ ходими ҳайдовчини бу ҳаракати учун жавобгарлик мавжудлигини бир неча бор айтган бўлса-да, у пора таклиф қилишни давом этган. Сафдор Комиловнинг билдиргисига асосан ИИВ Шахсий хавфсизлик бош бошқармаси ва департаментнинг Бойсун тумани бўлимлари ходимлари томонидан тезкор тадбир олиб борилиб, ҳайдовчи И.Ч. ЙПХ ходимига 1,5 миллион сўмни берганида ушланган.
Ҳозирда фуқарога нисбатан Жиноят кодексининг 211-моддаси (пора бериш) билан жиноят иши қўзғатилган бўлиб, тергов ҳаракатлари олиб борилмоқда.
Аввалроқ Бухорода маст ҳолда машина бошқарган ҳайдовчи ЙПХ инспекторига 100 доллар пора беришга урингани тўғрисида хабар берилганди.
Изоҳ (0)