Шавкат Мирзиёев номига АҚШ президенти Жо Байдендан мактуб келди 

АҚШ президенти Жо Байден Ўзбекистон президенти Шавкат Мирзиёев номига мактуб йўллаб, уни Наврўз байрами муносабати билан табриклади. Бу ҳақда давлат раҳбарининг матбуот хизмати хабар берди. 

Ўзбекистон Республикаси президенти Шавкат Мирзиёев Жаноби Олийларига

Ҳурматли Президент жаноблари!

Америка халқи номидан Сизга ва Ўзбекистон халқига Наврўз айёми муносабати билан энг эзгу тилакларимизни йўлламоқдаман.

Ўтган йил давомида Ўзбекистон ва Америка Қўшма Штатлари умумий муаммоларни ҳал қилиш, халқларимиз хавфсизлиги ва фаровонлигини таъминлаш мақсадида бирлашди.

Ушбу уйғониш ва янгиланиш мавсумида Қўшма Штатлар Ўзбекистон халқига содиқлигини яна бир бор тасдиқлайди. Шу кунларда янги марраларни белгилаб, мустаҳкам тинчлик ва ўзаро англашув руҳидаги умумий келажак сари саъй-ҳаракатларимизни давом эттирар эканмиз, мен мамлакатларимиз ўртасидаги стратегик шериклик ва халқларимиз дўстлиги янада мустаҳкамланишига ишонаман.

Наврўз муборак!

Ҳурмат билан, Жозеф Байден, Америка Қўшма Штатлари президенти

Эслатиб ўтамиз, февраль ойида ҳам Байден Ўзбекистон президентига мактуб йўллаганди. Ўшанда у Шавкат Мирзиёевга мамлакатлар ўртасидаги муносабатларни мустаҳкамлашда кўрсатаётган етакчилиги ва шахсий интилиши учун, шу жумладан, хавфсизлик соҳасидаги ҳамкорлик учун чуқур миннатдорлик билдирган эди.