2017—2022 йиллар оралиғида Ўзбекистонда транспорт турлари юк айланмасида рўй берган ўзгаришлар таҳлил қилинди. Бу ҳақда Прогнозлаштириш ва макроиқтисодий тадқиқотлар институти хабар берди.
Таҳлил мазкур давр мобайнида мамлакатда юк ташиш айланмасида сезиларли ўсиш бўлганлигини кўрсатди. Барча транспорт турларида умумий юк айланмаси 2017 йилдаги 66,9 млрд т-километрдан 2022 йилда 75,2 млрд т-километрга ошди. Хусусан:
2017—2022 йилларда темирйўл транспортида ташилган юк айланмаси 22,9 млрд т-километрдан 24,9 млрд т-километрга ошди.
Автомобиль транспортининг ҳиссасига тўғри келувчи юк айланмаси қарийб 1,5 баробар ошди.
Агар таҳлил қилинаётган давр бошида мазкур кўрсаткич 13,6 млрд т-километрни ташкил этган бўлса, 2022 йилга келиб 20,2 млрд т-километрга етди.
2017—2022 йилларда ҳаво транспортининг юк айланмаси 2 баробарга, яъни 156,9 млн т-километрдан 322,7 млн т-километргача ошди.
Транспорт хизматлари бозори ва инфратузилмасини ривожлантириш мақсадида 2022—2026 йилларга мўлжалланган Янги Ўзбекистоннинг Тараққиёт стратегиясида бир қатор тадбирлар белгиланган.
Жумладан:
- ҳудудларда юклар шаклланишининг асосий нуқталарини ҳисобга олган ҳолда транспорт-логистика марказлари тармоғини ташкил этиш;
- халқаро юк ташувларидаги транспорт ҳужжатларини (“э-Пермит”, “э-ТИР”, “э-CМР”) электрон кўринишга босқичма-босқич ўтказиш;
- мавжуд контейнер терминалларини давлат-хусусий шериклик асосида ривожлантириш;
- темирйўлда контейнер ташиш улушини камида 2 баробар ошириш режалаштирилган.
Умуман айтганда, юк айланмасининг барқарор ўсиши транспорт инфратузилмасини ривожлантириш ва ташқи савдо фаолиятини эркинлаштириш натижасидир. Келгусида юк айланмасини янада ошириш замирида рақамлаштириш, инфратузилмаларни модернизация қилиш ва ташувчилар учун қулай шарт-шароитларни яратиш ётади.
Изоҳ (0)