Колбаса, пишлоқ ва лаваш хамиридан конверт шаклидаги егулик тайёрлаймиз

Егуликни бир неча дақиқада тайёрлаш мумкин. Лаваш хамирига қўшилган пишлоқ егуликни янада мазали қилади. Унга ўзингизга ёққан кўкатларни ҳам қўшишингиз мумкин.

Керакли масаллиқлар:

• қаттиқ пишлоқ — 140 г;
• колбаса — 70 г;
• юпқа лаваш хамири —1 дона;
• тухум — 1 дона;
• туз — 1 чимдим;
• ўсимлик ёғи — 1 қошиқ.

Тайёрланиши:

1. Колбаса ва пишлоқни юпқа қилиб тўғраб олинг. Пишлоқ бўлаклари колбасага қараганда икки баробар кўп бўлиши керак;
2. Лаваш хамирини унча катта бўлмаган бир нечта бўлакларга бўлинг; 
3. Ҳар бир хамир бўлагига бироз пишлоқ, сўнгра колбаса ва яна пишлоқ солинг;
4. Хамир бўлакларини учбурчак шаклида қатлаб олинг. Маҳсулотлар солинган қисми ёпиқ бўлиши керак;
5. Тухумга бироз туз қўшиб, санчқи ёрдамида аралаштиринг;
6. Конверт шаклидаги хамирни тухум аралашмасига ботириб, 3-5 дақиқа давомида қизаргунга қадар қовуринг.

Ёқимли иштаҳа!