Тошкент шаҳри Яшнобод туманида видеомурожаати орқали диний адоват қўзғатган эркакка жиноят иши қўзғатилди. Бу ҳақда шаҳар Ички ишлар бош бошқармаси ахборот хизмати хабар берди.
Хабарга кўра, февраль ойида ижтимоий тармоқларда номаълум шахснинг диний адоват қўзғатувчи мазмундаги таҳдидли видеомурожаати тарқалиб, турли муҳокамаларга сабаб бўлмоқда. Ушбу ҳолат юзасидан ўтказилган ўрганишлар давомида мазкур видеомурожаат муаллифи 1990 йилда Тошкент шаҳрида туғилган фуқаро Н.Х. экани аниқланди.
Дин ишлари бўйича қўмитанинг хулосасига асосан ушбу видеоролик экстремизм ғоялари билан йўғрилган бўлиб, диний адоват келтириб чиқаришга хизмат қилади ва шу турдаги материалларни Ўзбекистон ҳудудига олиб кириш, тайёрлаш ва тарқатиш тақиқланади.
Юқоридаги ҳолат юзасидан фуқаро Н.Х.га нисбатан Яшнобод тумани ИИО ФМБ ҳузуридаги Тергов бўлими томонидан Жиноят кодексининг 244-1-моддаси учинчи қисми (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш, оммавий ахборот воситаларидан ёхуд телекоммуникасия тармоқларидан, шунингдек Интернет жаҳон ахборот тармоғидан фойдаланиб содир этилган бўлса) билан жиноят иши қўзғатилиб, тергов ҳаракатлари олиб борилмоқда.
Изоҳ (0)