Давлат хавфсизлик хизмати Андижон ва Сирдарёда ер майдонлари ноқонуний сотилишининг олдини олди.
Хабарга кўра, Сирдарёдаги ҳолат Давлат хавфсизлик хизматининг вилоят бўйича бошқармаси ходимлари томонидан вилоят ички ишлар бошқармаси ҳамда Иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказилган тезкор тадбирда аниқланган. Боёвут туманидаги масъулияти чекланган жамият раҳбари мазкур МЧЖга қурилиш материаллари ишлаб чиқариш учун нотурар жой сифатида берилган 1 гектар ер майдонининг 50 сотихини турар жой қуриш учун кадастр тизимидаги танишлари орқали харидор номига расмийлаштириб бериш эвазига 12 500 АҚШ доллари олган вақтида ушланди.
Шунингдек, Андижон вилоятида кузатилган ҳолатда эса Улуғнор ва Балиқчи туманида яшовчи икки фуқаро Улуғнор туманидаги фермер хўжалик раҳбарига гўёки мазкур хўжалик ер майдонларида шерикчилик асосида тадбиркорлик билан шуғулланишларини айтади. Шундан сўнг унинг ишончига киради ва фермер хўжалигига боғдорчилик учун ажратилган 4 гектар ер майдонининг кадастр ҳужжатларини ҳамда фермер хўжаликнинг расмий муҳрини қўлга киритади.
Давлат хавфсизлик хизматининг Андижон вилояти бўйича бошқармаси, вилоят ички ишлар бошқармаси ҳамда Иқтисодий жиноятларга қарши курашиш департаментининг ҳудудий бошқармаси ходимлари ҳамкорлигида ўтказилган тезкор тадбирда мазкур икки фуқаро ушбу 4 гектар ер майдонини 148 миллион 200 минг сўм эвазига харидор номига расмийлаштириб беришга келишиб, ундан сўралган пулни олган вақтларида ушланди.
Маълум қилинишича, ҳозирда мазкур ҳолатлар юзасидан ушбу шахсларга нисбатан жиноят ишлари қўзғатилган.
Изоҳ (0)