Тошкент аэропортида йўловчиларни кутиб олиш учун янги зоналар қурилади

Uzbekistan Airports йўловчиларни кутиб олувчилар учун Тошкент халқаро аэропортининг учиб келиш зали ёнидаги П2 ва П3 автотураргоҳларида иккита янги ҳудуд қуришга қарор қилди. Бу ҳақда авиакомпания ахборот хизмати хабар берди. 

Хабарга кўра, йўловчилар оқимининг жадал суръатларда ўсиб бораётгани сабабли яқинлари ва дўстлари билан учрашиш учун келганларга учиб келиш терминалида ажратилган ҳудуд етарли бўлмай қолган. Uzbekistan Airports акциядорлик жамияти бошқаруви раиси Раъно Жўраеванинг таъкидлашича, 2018 йилда қурилган учиб келиш зали халқаро стандартларга жавоб бермайди, у ерда кутиб олувчилар учун жой ажратилмаган. 

“14 январдан бошлаб қаттиқ совуқ туфайли республика аэропортлари аэровокзал биносида одамларни кутиб олиш учун рухсат олди. Илгари такидланганидек, 2018 йилда қурилган учиб келиш зали халқаро стандартларга жавоб бермайди, у ерда кутиб олувчилар учун жой ажратилмаган. Бир неча кун ичида биз божхона зонасини кутиб олиш зонасидан ажратиш чораларини кўрдик. 400 кв.м майдон ҳар куни аэропортга яқинларини кутиб олишга келганлар учун жуда торлик қилди.  Одамларнинг кўплиги кутиб олувчилар учун ҳам, жонли йўлакдан ўтишга мажбур бўлган йўловчилар учун ҳам ноқулайликлар туғдирди. Йўловчилар ва хавфсизликни таъминловчи хизматлардан жуда кўп шикоятлар келиб тушди. Бу вақт давомида биз кутиб олувчилар учун янги ҳудуд лойиҳаси устида ишладик. Аммо биргина бино вазиятни сезиларли даражада ўзгартирмаслигини англаб етдик”, — деди Uzbekistan Airports акциядорлик жамияти бошқаруви раиси Раъно Жўраева.

Маълум қилинишича, март ойининг охирига қадар умумий майдони қарийб 1400 кв.м бўлган иккита шундай ҳудуд қурилади — бири мавжуд соябонлар ўрнига, иккинчиси — кетиш ва келиш заллари оралиғидаги П2 автотураргоҳида. Яқин кунларда аэропорт олди майдонида қурилиш-монтаж ишларини бошлаш режалаштирилган.