Ўзбекистон давлат жисмоний тарбия ва спорт университети ва унинг Фарғона филиалида қатор камчиликлар аниқланди. Бу ҳақда Бош прокуратура ахборот хизмати хабар берди.
Хабарга кўра, Бош прокуратура томонидан Ёшлар сиёсати ва спорт вазирлиги билан биргаликда Ўзбекистон давлат жисмоний тарбия ва спорт университети фаолияти ўрганилганида, бир қатор хато ва камчиликларга йўл қўйилгани аниқланди. Хусусан, олийгоҳга ўқишга қабул қилишда қонунчилик талаблари бузилиб, қабул жараёнларининг шаффофлиги таъминланмаган. Бундан ташқари,
- ижодий имтиҳонларни ўтказиш учун 10 та йўналиш бўйича 3 кишидан кам бўлмаган таркибда комиссия шакллантирилмаган;
- 21 та спорт тури бўйича ўтказилган ижодий имтиҳонларда айнан бир шахс бир вақтда комиссияларга раислик қилган;
- 24 та таълим йўналиши бўйича 189 нафар абитуриентнинг имтиҳон натижалари баённомаларда ҳаққоний акс эттирилмаган;
- 26 нафар абитуриентнинг ижодий имтиҳон натижалари баённомаларда кўрсатилмасдан, асоссиз баҳоланган;
- от спорти, хоккей, фигурали учиш, тоғ чанғиси бўйича спорт иншоотлари мавжуд бўлмаса-да, 500 нафардан ортиқ абитуриент шу йўналишларга ўқишга қабул қилинган;
- 90 нафар абитуриентнинг ижодий имтиҳон баллари ошириб қўйилиб, талабаликка қабул қилинган.
Қайд этилишича, бунинг оқибатида ижодий имтиҳонлардан энг юқори балл тўплаб, давлат гранти асосида ўқишга қабул қилинган 30 нафар талаба 1-семестр якуни бўйича қониқарсиз баҳо олган. Худди шу каби қонун бузилиш ҳолатлари университетнинг Фарғона филиалида ҳам йўл қилгани аниқланган.
Шу билан биргаликда, университетда ўқишга қабул квоталари ҳам сунъий равишда оширилиб, 3 160 ўринли университетга 13 634 нафар ёки сиғимга нисбатан 4,5 баравар кўп талабалар қабул қилинган. Сўнгги 2 йилда талаба ва ўқитувчилар томонидан жами 6 та коррупциявий ва 23 та бошқа турдаги жиноятлар содир этилган.
Қайд этилишича, текшириш давомида ўтказилган тадбирда талабалар Д.И. ва Ж.С.лар фуқаро Ғ.М.ни ўқишга киритиш учун ундан 5 минг доллар олган вақтида ушланган. Бундан ташқари, 587 нафар ўқитувчи ва ходимларига 1,2 миллиард сўм рағбатлантириш пуллари ҳамда ўтилмаган дарс соатлари учун 172 миллион сўм маблағ ноқонуний тўланиб, талон-торож қилинган. Ҳозирда аниқланган қонун бузилиши ҳолатлари юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
Изоҳ (0)