Ўзбекистон ва Вьетнам нефть-газ ва нефть-кимё саноатида қўшма лойиҳаларни амалга ошириши кутилмоқда. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, Ўзбекистон ишчи гуруҳининг Вьетнамга ташрифининг иккинчи кунида Ханой шаҳрида инвестициялар, саноат ва савдо вазири Лазиз Қудратов Вьетнам Савдо-саноат палатаси президенти ҳамда етакчи компания ва уюшмалар раҳбарлари билан учрашув ва музокаралар ўтказди. Учрашувда электротехника, кимё, тўқимачилик, озиқ-овқат ва қишлоқ хўжалиги каби соҳаларда фаолият юритувчи 10 та корхона раҳбарлари ҳам иштирок этди.
Маълум қилинишича, МТТ директори Нгуен Ван Тхан билан компания икки лойиҳани амалга оширган Ўзбекистон қишлоқ хўжалиги соҳасида қўшма лойиҳаларни ҳаётга жорий қилиш масалалари муҳокама қилинди. Корхона раҳбарияти мамлакатда бизнес юритишнинг муваффақиятли тажрибасидан келиб чиқиб, балиқ етиштириш ва озуқа ишлаб чиқариш йўналишларидаги янги лойиҳалар орқали фаолиятини кенгайтириш нияти билан ўртоқлашди. Вьетнам Vietnam National Textile аnd Garment Group раиси B.Аён билан мулоқотда тўқимачилик саноатида қўшма инвестиция лойиҳаларини амалга ошириш масалалари келишиб олинди.
Шунингдек, “ПетроВиетнам” давлат корпорацияси раиси Ле Ман Хун билан нефть-газ ва нефть-кимё саноатида қўшма лойиҳаларни амалга ошириш имкониятлари муҳокама қилинди. Томонлар бу борадаги ҳамкорликни ривожлантириш учун катта имкониятлар мавжудлигини таъкидлаб, кимё маҳсулотлари ишлаб чиқариш, шунингдек, геология-қидирув лойиҳалари бўйича сармоявий ташаббусларни ҳамкорликда ишлаб чиқишга келишиб олди. “Виначем” Вьетнам миллий кимё гуруҳи раиси ўринбосари Нго Дай Қуангга Ўзбекистоннинг инвестициявий салоҳияти ҳақида батафсил маълумот берилди ва кимё саноати бўйича лойиҳавий таклифлар тақдим этилди. Бир қатор инвестиция лойиҳаларини ишлаб чиқиш бўйича қўшма ишчи гуруҳ тузиш бўйича келишувга эришилди.
Бундан ташқари, 1954 Company бош директори А. Пҳунг Вьетнамнинг илғор тажрибасига асосланган йирик шоли етиштирувчи кластерларни яратиш бўйича лойиҳаларни амалга оширишга қизиқиш билдирди. Учрашувлар якунлари бўйича иштирокчилар ўзаро ҳамкорликнинг барча муҳокама қилинган йўналишларида ҳамкорликни фаоллаштиришга ўзаро тайёр эканликларини билдирди ва муҳокама қилинган лойиҳа ва ташаббусларни амалга ошириш бўйича навбатдаги тадбирларни белгилаб олди.
Изоҳ (0)