“Реал” раҳбариятининг Карло Анчелоттига ишончи пасайган. Клублар ўртасидаги ЖЧ мураббий учун ҳал қилувчи бўлиши мумкин

Мадриднинг “Реал” клуби Испания Суперкубогида “Барселона”га мағлуб бўлди ва Ла Лигада каталонияликлардан 8 очко ортда бормоқда.

Бу эса “Реал” раҳбариятининг бош мураббий Карло Анчелоттига нисбатан ишончи камайишига сабаб бўлмоқда, дея хабар беради Relevo.

Испания Суперкубогидаги мағлубиятдан сўнг раҳбариятнинг италиялик мутахассисга нисбатан ишончи сўнгган. Шу сабабдан клублар ўртасидаги Жаҳон чемпионати Анчелотти учун ҳал қилувчи мусобақага айланиши мумкин. Бунга нафақат жамоанинг натижалари, балки умумий ўйин ҳолати ҳам сабаб бўлган. 

Анчелоттининг ўзи ҳам раҳбариятнинг унга нисбатан муносабати ўзгарганини билган ҳолда, хато қилишга ҳаққи йўқлигини билиб турибди. “Реал” унга қандай талаблар қўйишини билиб турибди. Шунингдек, мураббий жамоа муваффақиятсизликка ўз муносабатини кўрсатиши лозимлигини сезмоқда. 

Анчелотти мавсум охирида “Реал”ни совринлар сари етакламоқчи.

Қишки трансферлар ойнасида бирорта харидни амалга оширмасдан, таркибдан мамнун эканини айтган бўлса-да, Карло 6 та мусобақада 15-16 нафар футболчига таяниши керак бўлган ҳолатга тушиб қолди. Хусусан, Анчелотти “Реал” Карим Бензема билан алмашиб ўйнайдиган ҳужумчи сотиб олишини хоҳлаган, аммо бу амалга ошмади. 

“Реал” 8 февраль куни клублар ўртасидаги Жаҳон чемпионати ярим финалида “Ал-Аҳли”га қарши баҳс олиб боради. Учрашув 00:00 да старт олади.