Рамзан Қодиров Украинадан кейин Польшани “денацификация” қилмоқчи
Чеченистон раҳбари Рамзан Қодиров Украинадаги “махсус ҳарбий операция” муваффақиятли якунланганидан сўнг шахсан ўзи Польшани “денацификация ва демилитаризация” қилиш ниятида эканини айтди.
Қодиров бу ҳақда Польша президентининг Халқаро сиёсат бюроси раҳбари Маркин Пшидачнинг Варшава Вашингтондан Польша Украинага юборган ҳарбий техникалар ўрнига қурол жўнатишини кутаётгани ҳақидаги сўзларига жавобан гапирди. Хусусан, Пшидачнинг таъкидлашича, Америкадан Польшага Abrams танклари ва Патриот зенит-ракета тизимлари келиши керак. Унинг қўшимча қилишича, Варшаванинг мақсади “Россияни тийиб туриш”.
“Мен сатанизмга (иблисона ҳаракатлар) қарши кураш бутун Европада ва биринчи навбатда Польша ҳудудида давом этиши кераклигини бир неча бор таъкидлаганман. Шундай қилиб, поляклар учун вақт келди”, — деб ёзди Қодиров Telegram’даги каналида.
Унинг сўзларига кўра, Польшанинг Силезия минтақаси “алоҳида мустақил мақомга лойиқ”, йилдан йилга у ерда ҳудуднинг автоном бўлиши тарафдорлари кўпаймоқда. Қодировнинг фикрича, у ерда референдум ўтказилиши керак ва Россия уни ўтказишда “ташкилий ёрдам бера олади”.
Польша Россиянинг Украинадаги босқини бошланганидан сўнг, мудофаани кучайтирди. 2022 йил июль ойида Польша Мудофаа вазирлиги раҳбари Мариус Блашак мамлакатда Европа НАТО давлатлари орасида энг кучли қуруқликдаги қўшинларни яратишга ваъда берганди.
Хусусан, Польша АҚШдан қурол сотиб олмоқда. Масалан, апрель ойида Варшава Вашингтондан 250 та Abrams танкини сотиб олди. Биринчи жанговар зирҳли техникалар июль ойи ўрталарида ҳарбий машғулотларга етиб келган, деди Блашак. Етказиб бериш 2026 йилда якунланиши режалаштирилган. Июль ойи охирида Қўшма Штатлар НАТОнинг “шарқий қанотдаги Россия агрессиясини тўхтатиш” миссиясини қўллаб-қувватлаш учун Польшага бешинчи авлод Boeing Ф-22 Raptor қирувчи самолётларини юборганди.
