Ўзбекистон захиралари қарийб 36 млрд долларга етди. Бу рекорд

2023 йил 1 февраль ҳолатига кўра, Ўзбекистоннинг олтин-валюта захиралари 35,94 млрд долларни ташкил қилди. 

Шу тариқа январь ойи якунларига кўра, мамлакат захиралари 2018 йилдан бери (статистика ўша йилдан бошлаб эълон қилинади) энг юқори кўрсаткични қайд этди. Аввалги рекорд 2022 йилнинг май ойида кузатилган эди — 35,90 млрд доллар. 

Захиралар ўтган ойга нисбатан 174,4 млн долларга кўпайди. Улар асосан олтин ва хорижий валютадан иборат. Декабрь ойида валюта захиралари камайган бўлса, олтин захиралари кўпайган:

• валюта — 331,3 млн долларга камайди (умумий 11,31 млрд доллар);
• олтин — 491,6 млн долларга кўпайди (умумий 23,56 млрд доллар).

Январда Ўзбекистоннинг олтин-валюта захиралари кетма-кет учинчи ой кўпайди. Мамлакат захираларида тахминан 385 тонна олтин бор ва декабрга нисбатан 10 тоннага камайган.

Олтин захираларида ушбу металлнинг ҳажми камайган бўлса ҳам қиймати кўпайган. Бунга жаҳонда олтин нархларининг ўсиши сабаб бўлган. 

1 февраль куни бир грамм олтин нархи 2022 йилнинг май ойидан бери биринчи марта қарийб 63 долларга етди. 7 февраль куни нархлар 60 доллар атрофида шаклланган.  

Олтин захиралари нима учун керак?

Оддий тил билан айтганда, бу суғурта, давлатнинг “хавфсизлик ёстиғи”. Захиралар дунёнинг деярли барча мамлакатларида фавқулодда вазиятлар учун мавжуд.

Захиралар одатда юқори ликвидли, яъни тез сотиладиган активларда сақланади. Олтин ва хорижий валюта ушбу талабларга жавоб беради — улардан исталган вақтда қарз тўлаш ёки инвестициялар учун фойдаланиш мумкин.

2017 йилгача Ўзбекистон захиралари тўғрисидаги маълумотлар жамоатчиликка эълон қилинмас эди. Ўша йилнинг ноябрь ойида захиралар 26 миллиардни ташкил этиши маълум бўлган. Ўшандан бери улар 10 млрд долларгача ўсган. 

Захиралардан қандай мақсадларда фойдаланиш мумкин ва ўрни қандай тўлдирилади?

Захиралардан турли мамлакатларда турлича фойдаланилади. Бу одатда тўлов баланси тақчиллигини молиялаштириш, валюта бозорида интервенсиялар ўтказиш, миллий валюта курсини ушлаб туриш, ташқи қарзларни қоплаш ва бошқаларни ўз ичига олади.

Захиралар мамлакатда қазиб олинган олтин, халқаро бозорга қимматли қоғозлар чиқарилиши, савдо баланси профицити ва бошқалар ҳисобига тўлдирилади.

Масалан, Ўзбекистонда захиралар ОКМК ёки НКМК томонидан қазиб олинган олтин ҳисобига тўлдирилади. Олтин четга сотилганда мамлакатдаги захиралар ҳам камаяди. Ўзбекистон эса ноябрда март ойидан бери биринчи марта олтин сотди.