Қорақалпоғистонлик Зулайҳо Ғаниева 49 ёшда. У Хўжайли туманидаги “Шағалакўл” маҳалласида истиқомат қилади. Тўрт нафар фарзанднинг онаси ва уч нафар набиранинг бувиси бўлган аёл шу вақтга қадар оила, бола-чақа, уй-рўзғор ташвиши билан тайинли ишга ҳам киролмаган. Ҳечдан кўра кеч деганларидек, нафақа ёшига етгач бедана боқишни йўлга қўйган. Айни кунга келиб эса ишбилармон аёлга айланди.
“Дарё” мухбири Зулайҳо опани суҳбатга тортди.
Маълум бўлишича, ҳоким ёрдамчиси томонидан тавсия қилинган “Оилавий тадбиркорлик” дастури доирасида 33 миллион сўм кредит олган Зулайҳо опа ўз тадбиркорлигини бошлаб юборган.
Дастлаб товуқ олиб тадбиркорлик қилишни ният қилган Зулайҳо Ғаниева бу фикридан қайтган. Товуқ 10 кун тухум қўйиб, бир ҳафта “дам олишини” билган опа ҳар куни тухум қўювчи беданаларни боқишга қарор қилган.
Қайд этилишича, Қорақалпоғистонда айни кунга қадар ҳам бедана боқиш ривожланмаган. Нукусда эндигина кўзга ташланган соҳа, Хўжайли туманида деярли йўқ ҳисобида.
Зулайҳо ая беданаларига ўзига хос эътибор қаратади. У 1000 дан ортиқ беданаларига майин мусиқа қўйиб беради. Ва мусиқа садолари остида иссиқ кунларида минглаб тухум санаб олади.
“Бу жониворлар стрессга берилувчан экан. Салгина шовқинга қўрқиб қолади. Шунинг учун майин, табиат мусиқаларини қўйиб бераман. Агар бедана қўрқиб стрессга берилса, тухум туғишига таъсир қилади. Бу эса даромадга таъсир қилади. Ҳозир ёмон эмас. 1000 га яқин беданадан кунига 250-300 га яқин тухум оламиз. Уларнинг донасини 500 сўмдан сотаман. Невараларим, турмуш ўртоғим ейишади. Касал бўлишмайди — жуда фойдали. Ёзга, иссиқ кунларга чиқиб кетсак, куни 1000 та тухум ҳам олиш мумкин”, — дейди Зулайҳо Ғаниева.
Изоҳ (0)