“Кимга ишонсам, шуни тайинлайман” — Рамзан Қодиров Чеченистон ҳукуматидаги қариндошлари ҳақида гапирди

Чеченистон раҳбари Рамзан Қодиров яқин қариндошлари давлат лавозимига тайинлангани сабабли уни қонунбузарликда айблашларини “кулгили” деб атади.

Қодиров ForPost нашрининг “Қодировлар сулоласи” ҳақидаги материалига шу тарзда жавоб берди, унда Чеченистон раҳбарининг 26 ёшли жияни Ҳамзат Қодировнинг мулк ва ер муносабатлари вазири, республика бош вазирининг ўринбосари лавозимларига тайинлангани ҳақида сўз боради. Мақолада нашр социолог Анна Очкина ва сиёсатшунос Юрий Самонкиннинг фикрига, шунингдек, “Давлат фуқаролик хизмати тўғрисида”ги федерал қонуннинг 16-моддасига ишора қилади, унга кўра, агар бири бошқасига бўйсунадиган бўлса, яқин қариндошни давлат хизматига қабул қилиш тақиқланади.

“Очкин ва Самонкин кабиларнинг малакаси бир тийинга арзимайди. Уларнинг ваҳималарини тингланг, минтақадаги юз минглаб ходимлар орасида менинг бир нечта яқин қариндошларим борлиги сабабли бутун республика парчаланармиш. Кулгимни қистаманг”, — деб ёзди Чеченистон раҳбари Telegramъдаги каналида. “Қайси муассаса ва қайси лавозимда бўлмасин, қариндошларимга ишга қўйилган талаб ўн баробар кўп, чунки улар менга раҳмат айтиш учун эмас, менга қарамай ишлаётганини исботлаши керак. Кимга ишонсам, шуни тайинлайман”.

BBC рус хизматининг 2018 йилги ҳисоб-китобларига кўра, Чеченистондаги 158 нафар юқори мартабали амалдорнинг 30 фоизи Рамзан Қодировнинг қариндошлари, 23 фоизи қишлоқдошлари, яна 12 фоизи Чеченистон раҳбарининг дўстлари ва уларнинг қариндошларидир. 2021 йилда Чеченистон раҳбари Рамзан Қодировнинг қизи Оишат республика маданият вазири бўлди. Бу лавозимга тайинланганида у 22 ёшда эди.