БАА Ўзбекистонда аёлларни касбга ўргатиш, уларнинг бандлигини таъминлаш борасидаги ишларни эътироф этди
Олий Мажлис Сенати раиси Танзила Норбоева БААга расмий ташриф доирасида ушбу давлатнинг Оилани ривожлантириш жамғармаси олий раиси Фатима бинт Мубарак билан учрашди.
Парламент юқори палатаси маълумотига кўра, мулоқот чоғида Фатима бинт Мубарак, сўнгги йилларда Ўзбекистонда гендер тенглик, хотин-қизларнинг жамиятдаги ўрнини кучайтириш масалаларида эришилган ижобий ютуқларни юқори баҳолаб, ушбу йўналишда икки мамлакат ўртасида амалий ҳамкорликни кучайтириш таклифини қўллаб-қувватлашини билдирди.
Учрашув давомида амирликлар тарафи Ўзбекистонда аёлларни касбга ўргатиш, хусусан, нафақат касаначилик, текстиль саноати, балки ахборот технологиялари соҳаларида ҳам аёлларнинг салоҳиятини оширишга давлат даражасида алоҳида эътибор берилаётгани, шунингдек, қишлоқ ҳудудларида аёллар бандлигини таъминлаш борасидаги ишларни эътироф этди.
Бундан ташқари, томонлар хотин-қизларнинг ҳуқуқ ва манфаатларини ҳимоя қилиш, уларнинг жамиятдаги ролини ошириш ва оила институтини ҳар томонлама мустаҳкамлаш масалаларини муҳокама қилди.
Мазкур йўналишда Ўзбекистон ва БААда олиб борилаётган ислоҳотлар, хотин-қизларнинг давлат ривожидаги ҳиссаси, ушбу йўналишда ўзаро манфаатли ҳамкорлик ва тажриба алмашиш каби масалаларга эътибор қаратилди.
Шунингдек, БААга келиб турли сабаблар туфайли оғир вазиятга тушиб қолаётган ўзбек аёллари борасида ҳам ўзаро фикр алмашилиб, бундай аёлларга ҳар томонлама кўмак бериш масаласи ҳам муҳокама қилинди.
Учрашув якунида аёллар имкониятларини кенгайтириш соҳасида ҳамкорликни йўлга қўйиш, Ўзбекистон ва БААнинг етакчи олий таълим муассасаларида талаба қизлар учун алмашинув дастурларини ишлаб чиқиш, шунингдек, икки мамлакат тадбиркор аёллари форумини ўтказиш юзасидан дастлабки келишувларга эришилди.
