Декабрда Ўзбекистонда банк операциялари сони қандай ўзгаргани маълум қилинди

2022 йил декабрь ойидаги банклараро тўлов операциялари сони ва Товар-хом ашё биржасидаги фаоллик ошди. Бу ҳақда “Дарё”га Иқтисодий тадқиқотлар ва ислоҳотлар маркази хабар бермоқда.

2022 йил декабрь ойида банклараро тўлов операциялари сони 6,4 миллионтани ташкил этди ва 2022 йилнинг ноябрь ойига нисбатан 302,2 минг транзакцияга (4,9 фоиз) ошди.

Банклараро тўлов операциялари сони 7 та ҳудудда ошган.

2022 йил декабрда мамлакатнинг 7 та ҳудудида юридик шахслар ўртасидаги банк операциялари сони ўтган ойга нисбатан ошган. Хусусан, сезиларли даражадаги ўсиш Андижон (55 фоиз), Қашқадарё (14,3 фоиз), Наманган (9 фоиз) вилоятлари ва Тошкент шаҳрида (4,9 фоиз) кузатилган.
 
Шу билан бирга Самарқанд (-10,5 фоиз), Навоий (-4,5 фоиз), Жиззах (-1,7 фоиз), Хоразм (-3,9 фоиз), Сурхондарё (-3,3 фоиз), Тошкент (-3 фоиз) ва Фарғона (-2,1 фоиз) вилоятларида камайиш кузатилган.

2022 йилнинг декабрь ойида ИФИнинг биржа компоненти 1,0675 бирликни ташкил этди. Бу эса, ушбу компонентнинг ўтган ойга нисбатан 6,7 фоизга ошганлигини англатиб, ҳар бир битим бўйича сотиб олинган товарлар ўртача ҳажмининг 10,6 фоизга ва битимлар сонининг 2,9 фоизга ошганлиги билан изоҳланади.

Ўзбекистон Товар-хом ашё биржасида товарлар савдоси умумий айланмаси ҳажми 2022 йил декабрь ойида 6,82 трлн сўмни ташкил этиб, ушбу кўрсаткич ўтган ойга нисбатан 7,3 фоизга ошган.