Ўзбекистондан 2022 йилда 8,8 минг киши кўчиб кетди

2022 йил январь—декабрь ойларида Ўзбекистондан хорижга 8,8 минг нафар инсон кўчиб кетган. Бу ҳақда Статистика агентлиги хабар қилди.

Қайд этилишича, кўрсаткич, сўнгги 5 йилда сезиларли камайган, яъни 2018 йилга нисбатан 8,8 мингтага ёки 50,0 фоизга қисқарган. Кўчиб кетганлар орасида эркаклар 4,1 минг кишини, аёллар 4,7 минг кишини ташкил этган.

Ўзбекистон Республикасидан хорижий мамлакатларга кўчиб кетганларнинг асосий қисми Қозоғистон Республикаси (жами 79,5 фоиз), Россия Федерацияси (16,4 фоиз), Қирғизистон Республикаси (0,7 фоиз), Тожикистон Республикаси (0,5 фоиз), Туркманистон Республикаси (0,3 фоиз) ва бошқа мамлакатлар (2,6 фоиз) ҳиссасига тўғри келган.

Бундан ташқари, 2022- йил январь декабрь ойларида республика бўйича доимий яшаш мақсадида кўчиб келганлар жами сони 214 821 кишини ташкил этган. Шундан республиканинг бошқа ҳудудларидан кўчиб келганлар 212 499 кишини, хорижий мамлакатлардан кўчиб келганлар 2 322 кишини ташкил этади.

Доимий яшаш мақсадида кўчиб кетганлар сони жами 221 288 кишини кўрсатиб, миграция салдоси минус -6 467 кишига тўғри келган.