Фарғона вилоятдаги энг йирик қуёш фотоэлектр станцияси ишга туширилди. “Дарё” мухбири мазкур станцияда бўлиб, унинг имкониятлари ҳақида репортаж тайёрлади.
Фарғона иссиқлик электр марказида фойдаланишга топширилган қуёш фотоэлектр станциясининг лойиҳа қиймати 14,1 миллиард сўмни ташкил этади.
2022 йилнинг май ойида қурилиши бошланган ушбу лойиҳанинг якуний тажриба синов босқичлари тугалланди ва қуввати 1800-2000 кВт соат бўлган қуёш фотоэлектр станциясидан фойдаланиш бошланди.
2 гектар майдонда жойлашган мазкур қуёш фотоэлектр станциясининг ишга туширилиши натижасида йиллик қўшимча 5 миллион кВт соат электр энергия ишлаб чиқариш имконияти яратилди.
Шунингдек, мана шунча электр энергия ишлаб чиқариш учун сарфланадиган 1,2 миллион куб метр табиий газ ва 300 минг кВт соат электр энергия иқтисод қилинади. Ҳисоб-китобларга кўра, станциянинг иқтисодий самараси йиллик 300 минг долларни ташкил этади ва 7 йилда қилинган харажатларни тўла қоплаши кўзда тутилган.
Бу ерда олинган муқобил энергия ҳисобига Фарғона шаҳрининг Қиргули мавзесидаги истеъмолчиларнинг электр энергияга бўлган эҳтиёжини узлуксиз таъминлашга босиқма-босқич эришилади.
Мутахассисларнинг маълумотларига кўра, қуёш фотоэлектр станциялари икки хил услубда – оn grid ва оff grid режимларида ишлайди. Мазкур қуёш фотоэлектр станцияси он грид услубида, яъни қуёшдан олинган электр энергияни тўғридан тўғри тармоққа етказиш режимида ишлайди.
Мазкур станцияда 2 минг 816 дона қуёш панели ўрнатилди. Ҳар бир қуёш панелининг қуввати 865 ватдан иборат. Қуёш фотоэлектр станцияси 16 бўлимдан ташкил топган бўлиб, ҳар бир бўлим 125 кВт қувватга эга. Мана ҳозирга вақтда 750 кВт соат электр энергия ишлаб чиқаришни бошлади. Бу 350-400 та хонадонни электр энергия билан таъминлашга етади. Ёз кунларида станциямиз тўлиқ қувват беришни бошлайди. Станция тўла қувват билан ишлаганда 1000 га яқин хонадонни энергия билан таъминлайди. Очиқ тармоқ режимида ишлаганда станция кун давомида қуёшдан максимал энергияни олиб тармоққа бевосита узатади. Берк тармоқ режимида ишлаганда қуёш энергиясини махсус аккумуляторларга тўлдиради ва кечқурун истеъмолчиларга етказиб беришни таъминлайди, — дейди “Фарғона иссиқлик электр маркази”нинг электр цехи бошлиғи Алишер Мўминов.
Мазкур қуёш фото электр станциясига ўрнатилган қуёш панеллари учун 25 йил кафолат берилган. Яна 7 йилдан сўнг бу ерда ҳаражатсиз йиллик 5 миллион кВт соат электр энергиядан фойдаланиш мумкин бўлади.
Изоҳ (0)