Хитой АҚШ чипларидан фойдаланган ҳолда атом қуроллари яратмоқда — WSJ
Хитойнинг ядровий қурол бўйича тадқиқот олиб борувчи институти санкцияларга қарамай, узоқ вақтдан бери АҚШда ишлаб чиқарилган компьютер чипларини ишлатиб келмоқда. Бу ҳақда The Wall Street Journal хабар берди.
Нашрнинг маълум қилишича, 1997 йилдан бери санкциялар остида бўлган ва ядро қуролини яратиш билан шуғулланган Хитой муҳандислик физикаси академияси Intel ва Nvidia компанияларидан яримўтказгич чипларини харид қилган. Бундай харидлар камида 2020 йилдан бери амалга оширилиб келинган.
Журналистлар Америка чиплари Хитойнинг ўзида воситачилик йўли билан сотиб олинганини аниқлади. Хусусан, академия ўлчамлари 7 дан 14 нанометргача бўлган чипларни харид қилган, бундай чиплар Хитойда ишлаб чиқарилмайди. Уларни Хитойнинг савдо майдончаларида осонгина сотиб олиш мумкин.
“Ушбу харидлар АҚШ томонидан ўрнатилган узоқ муддатли чекловларга зид. Мазкур чеклов Америка маҳсулотидан хорижий давлатлар томонидан атом қуроли соҳасидаги тадқиқотлар учун фойдаланишнинг олдини олишга қаратилганди”, — таъкидлади нашр.
Америкалик ишлаб чиқарувчилар дунёнинг турли мамлакатларида жуда кўп сонли компьютерлар сотилганини айтди. Шахсий компьютерларнинг охирги харидори ким бўлишини назорат қилиш эса имконсизлигини билдирди.
Маълумот ўрнида, 2022 йил август ойида АҚШ президенти маъмурияти Россия ва Хитойга компьютер чипларини сотишни чеклаганди.
