Нукусда икки нафар бола нимадан заҳарлангани аниқланди

Нукусда икки нафар бола заҳарланиб, улардан бири вафот этгани ҳақида хабар берилган эди. Санепидхизмат матбуот хизмати бунга нима сабаб бўлганини маълум қилди.

Ижтимоий тармоқларда улар тез тайёрланадиган лапша маҳсулотидан заҳарлангани ҳақида хабарлар тарқалганди. Аниқланишича, улар уйга кемирувчиларга қарши дори сепилишидан заҳарланган.

25 январь куни бемор Б.Б.нинг оғзаки кўрсатмасига кўра тушликда укаси М.А. билан бирга уйига яқин жойдаги озиқ-овқат дўконидан тез тайёрланадиган лапша маҳсулотини сотиб олиб, тайёрлаб истеъмол қилишган. Лапша маҳсулотини тайёрлаш жараёнида маҳсулотда айниш белгилари, ўзга ёт ҳид ва таъм сезилмаган.

Ўша куни 17:00-18:00 ларда Б.Б. уйида 1-1,5 йилдан буён сақланиб турган, номи ва ишлаб чиқарувчиси ҳамда сотиб олган жойи номаълум 500 граммга яқин селофан пакетда сақланиб турган, кукун кўринишидаги кемирувчиларга қарши дорини уй атрофи, ошхона ва битта хонага сепиб чиққан. Кемирувчиларга қарши дорини сепиш вақти ва сепганидан сўнг хоналарда ўткир ҳид сезилган.

26 январь куни соат М.А. 7:00-8:00 ларда, Б.Б. соат 9:30-10:00 ларда қайт қила бошлаган. Белгилар ўтиб кетмагандан сўнг тушлик вақтида тез ёрдам чақирилган. Лекин ота-онаси томонидан уйда даволаниш маъқул кўрилган. М.А. ва Б.Б. қайт қилишга қарши дорилар қабул қилган. Ўша куни тунги соат 23:00-24:00 лар атрофида М.А. ва Б.Б. такрорий қайт қила бошлаган.

27 январь куни соат 6:00-7:00 ларда тез ёрдам чақириб, Республика болалар юқумли касалликлар шифохонасига юборилган. Лекин беморларнинг касаллик белгилари юқумли касалликлардан бўлмагани сабабли Республика шошилинч тез тиббий ёрдам илмий маркази Қорақалпоғистон филиалига юборилган.

Шифокорлар томонидан беморларга “Фосфорорганик бирикмалардан ўткир заҳарланишнинг оғир ва ўрта оғир даражаси” бирламчи ташхиси қўйилган.

М.А. келгандаги аҳволи оғир ҳолатда, реанимасион чора-тадбирлар олиб борилишига қарамасдан беморда 27 январь соат 09:24 да биологик ўлим қайд қилинди. Фуқаро Б.Б нинг аҳволи қониқарли бўлиб, соғлиги шифокорлар назоратига олинган.

Юқоридаги ҳолат бўйича такрорий мурожаатлар бўлмаган ва профилактик ишлар давом эттирилмоқда.