Даниялик сиёсатчи, ўнг қанот Страм Курс (Қаттиқ курс) партияси асосчиси Расмус Палудан бу сафар Россиянинг Даниядаги элчихонаси олдида Қуръонни ёқиб юборди.
У ўзининг Instagram саҳифасида муқаддас китоб ёқиб юборилган видеони жойлаштирди. У бу сафарги “акция” асли чечен бўлган швед UFC жангчиси Ҳамзат Чимаев, шунингдек, Чеченистон раҳбари Рамзан Қодировга бағишланишини айтди.
“Ҳамзат Чимаев мени ҳақорат қилгани ачинарли. Шунинг учун мен унинг шарафига китобни Россиянинг Даниядаги элчихонаси олдида ёқишга қарор қилдим. Ҳамзат Рамзан Қодировдек безорилик қилишда давом этадими? Мен уларга ўзини тўғри тутишга ўргатишим керакми?” — деб ёзган радикал.
Эслатиб ўтамиз, Туркиянинг Швециядаги элчихонасида Қуръон биринчи марта ёқиб юборилганидан кейин Қодиров Палуданни “жаҳаннам маҳсули”, шунингдек, “иблис” деб атаган. Чимаев эса Палудан террорчи эканини таъкидлаган.
Россия элчихонаси олдида Қуръон ёқиб юборилганидан кейин Рамзан Қодиров даниялик сиёсатчини кечирмаслигини айтди.
“Даниялик бу сафарги муқаддас китобни ёқиб юборишини менга ъбағишладиъ. Менга нисбатан кўплаб мурожаатни кечиришим мумкин, лекин дунёдаги бир ярим миллиард мусулмон каби диний террорчининг бу ҳаракатини кечирмайман. Ҳа, мен учун бундай провокаторлар ҳақиқий террорчилар бўлиб, улардан соғлом жамиятни тозалишимиз керак”, — деди у.
Европа давлатларида Қуръоннинг ёқиб юборилиши
21 январь куни Расмус Палудан Туркиянинг Стокгольмдаги элчихонаси олдида Қуръонни ёқиб юборди. Шундан кейин Туркияда Швецияга қарши намойишлар бошланди. Мамлакатнинг Истанбулдаги Бош консуллигида оммавий акция бўлиб ўтди, унда Швеция байроғи ёқиб юборилди.
23 январь куни содир бўлган воқеалар фонида Туркия миллий мудофаа вазири Ҳулусий Акар Швеция ва Финляндия терроризмга қарши курашда Анқарага ёрдам беришни хоҳламаслигини билдирди. Айни пайтда мамлакатлар НАТОга киришда Туркиядан ёрдам кутмоқда.
23 январь Нидерландияда “Ватанпарвар европаликлар Ғарбнинг исломлашувига қарши” (ПЕГIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У Расмус Палуданни қўллаб-қувватлаш учун ўтказилганини маълум қилди.
27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.
Мавзуга доир:
Изоҳ (0)