Банклар, IT ва саноат: Ўзбекистоннинг энг юқори ойлик тўланган соҳалари эълон қилинди
2022 йилда Ўзбекистондаги иқтисодий фаолият турлари бўйича ўртача иш ҳақи миқдорлари маълум қилинди. Бу ҳақда Давлат солиқ қўмитаси хабар берди.
Иқтисодий фаолият турлари бўйича ўртача ойлик иш ҳақининг энг баланд кўрсаткичи — банк, суғурта, лизинг ва кредит воситачилик соҳаларига тўғри келади (10,8 млн сўм).
Ушбу фаолият тури бўйича ўртача ойлик иш ҳақининг энг юқори кўрсаткичи молиявий хизматлар кўрсатиш ва суғурталаш бўйича ёрдамчи фаолиятда (12,2 млн сўм) қайд этилди.
Энг паст кўрсаткичи эса мажбурий ижтимоий суғурталашдан ташқари, қайта суғурталаш ва нафақа жамғармалари фаолиятида (10,3 млн сўм) кузатилди.
Ахборот ва алоқа соҳасида ўртача ойлик иш ҳақи 7,5 млн сўмга тенг бўлган бўлса, ташиш ва сақлаш соҳасида бу қиймат 5 млн сўмни ташкил этади.
Соҳанинг асосий тармоқлари бўйича ўртача ойлик иш ҳақининг энг юқори кўрсаткичи компьютер дастурлаштириш, маслаҳат бериш ва бошқа ёрдамчи хизматларда (13,9 млн сўм), энг паст кўрсаткич эса ноширлик фаолиятида (6,5 млн сўм) кузатилди.
Саноат соҳасида ўртача ҳисобланган номинал иш ҳақи ўтган йилга нисбатан 642 мингга ўсиб, 4,9 млнни ташкил қилмоқда.
Саноатнинг асосий тармоқлари бўйича ўртача ойлик иш ҳақининг энг юқори кўрсаткичи тоғ-кон саноати ва очиқ конларни ишлаш тармоғи (7,1 млн сўм), электр, газ, буғ билан таъминлаш ва ҳавони кондициялаш (5,7 млн сўм) ҳамда ишлаб чиқариш саноатида (4,7 млн сўм) кузатилди.
Қурилиш соҳасида бу маблағ 4,6 млн сўмга тенг ҳисобланган бўлса, савдода ўртача ҳисобланган иш ҳақи — 3,9 млн сўм.
Соҳалар бўйича таълим ва соғлиқни сақлаш тизимида энг кам ўртача ойлик иш ҳақи тўланади.
2022 йилда таълим соҳаси учун ўртача ойлик иш ҳақи — 2,69 млн сўм ҳисобланган.
Таълим соҳасининг асосий тармоқлари бўйича ўртача ойлик иш ҳақининг энг юқори кўрсаткичи олий таълимда (6,1млн сўм), энг паст кўрсаткич эса мактабгача таълимда (1,5 млн сўм) кузатилди.
Соғлиқни сақлаш ва ижтимоий хизматлар кўрсатишда ўртача ойлик иш ҳақи 2,61 млн сўмга тенг деб белгиланган.
