Муслера ва Хименес 4 та ўйинга, Годин ва Кавани битта ўйинга четлатилди. ФИФА ЖЧ—2022 даги ҳаракатлари учун Уругвай терма жамоасини жазолади

ФИФА Уругвай терма жамоасини ЖЧ—2022 даги ҳаракатлари учун жазолади. 

Уругвай гуруҳ босқичининг сўнгги турида Ганани 2:0 ҳисобида мағлуб этган, бироқ плей-оффга чиқа олмаганди. 

Шундан сўнг Жанубий Америка вакиллари жанжал юзага келтирганди. “Атлетико” ҳимоячиси Хосе Хименес ҳакамнинг шаънига номақбул сўзлар айтганди. Уругвай футболчилари Гана дарвозаси томон 2 та пенальтини белгиламаган учрашув ҳаками Даниэль Зиберт ёнига бориб, унга норозилик билдирган. Хименес Зибертга яқинлашаман деб бехосдан ЖЧ—2022 ташкилотчилик бўйича ФИФА директорларидан бирини уриб юборган.

Халқаро футбол федерацияси Уругвай футбол ассоциациясини мухлисларнинг камситувчи ҳаракатлари, шунингдек, футболчиларнинг ножўя хатти-ҳаракатлари, ҳақоратлари ва ҳалол ўйин тамойилларини бузгани учун жазолади. 

Энди Уругвай ФИФА тасарруфидаги кейинги ўйинларини мухлисларсиз стадионда ўтказади. Шунингдек, ассоциация 50 минг швейсар франки (50 минг евро) миқдорида жарима тўлайди. 

Уругвайнинг футболчиларига ҳам алоҳида жарима белгиланди. Хименес 4 та ўйинга дисквалификация қилинди ва 20 минг франк тўлайдиган бўлди. Ундна ташқари ФИФАнинг жамоат ишларида иштирок этиши мажбурий этиб белгиланди. “Галатасарой” дарвозабони Фернандо Муслера ҳам худди шундай жаримага тортилди.

“Валенсия” ҳужумчиси Эдинсон Кавани битта ўйинга четлатилди, шунингдек, 15 минг франк жаримага тортилди. Худди шундай жазо “Велес Сарсфилд” ҳимоячиси Диего Годинга ҳам белгиланди.