ЕТТБнинг Ўзбекистонга киритган сармоялари 900 млн долларга етди

2022 йилда Европа тикланиш ва тараққиёт банки (ЕТТБ) Ўзбекистондаги 26 та лойиҳага қарийб 900 миллион доллар инвестиция киритди. Бу ҳақда банкнинг матбуот хизмати хабар берди.

Маълумотларга кўра, бу орқали Ўзбекистон кетма-кет учинчи йил Марказий Осиёдаги энг кўп маблағ олган мамлакатга айланди.

Ушбу молиялаштириш дастурлари орқали, қайта тикланадиган энергетикадан тортиб банк фаолиятига боғлиқ бир қанча соҳаларга инвестициялар киритилди.

Банкнинг мамлакатга йиллик сармояси бўйича аввалги рекорд 2021 йилда ўрнатилган — 690 миллион доллар.

• ЕТТБ Бухоро вилоятида умумий қуввати 1 ГВт бўлган иккита шамол электр станциясини қуриш ва ишга туширишга кўмаклашиш учун умумий қиймати 520 миллион долларга тенг иккита синдикатлаштирилган кредит ажратди.

Ушбу молиялаштириш ЕТТБнинг ўз минтақалари бўйлаб ҳозирги кунга қадар қайта тикланадиган энергия бўйича энг йирик лойиҳасидир.

• Банк Ўзбекистоннинг Навоий вилоятида қуввати 500 МВт бўлган яшил майдон шамол электр станциясини ривожлантириш, қуриш ва фойдаланиш учун 74 миллион доллар миқдорида молиялаштириш пакетини ташкил қилди.

Электр станцияси ишга туширилгач, йилига 545 миллион куб метр табиий газ тежалади ва карбонат ангидрид чиқиндиларини йилига 1,1 миллион тоннага камайтириб, йилига 500 минг хонадоннинг истеъмолига тенг бўлган 1,6 миллиард кВт/соат электр ишлаб чиқаришни таъминлайди.

• Энергетика секторидан ташқари ЕТТБ Хоразм ва Қорақалпоғистонда қаттиқ маиший чиқиндиларни бошқариш учун масъул бўлган ҳудудий коммунал хўжалик корхоналари учун умумий қиймати 120 миллион долларгача бўлган узоқ муддатли суверен кредитлар ажратди.

Лойиҳа Ўзбекистонда декарбонизация саъй-ҳаракатларига ҳисса қўшади ва қаттиқ маиший чиқиндиларни бошқариш бўйича миллий стратегияни қўллаб-қувватлайди.

• Молия соҳасида ЕТТБ “Асакабанк”, “Ипотека-банк” ва СҚБ банки учун 210 миллион доллар миқдоридаги янги савдони молиялаштириш лимитларини оширди.

Битим хусусий маҳаллий тадбиркорлик субъектларига, жумладан, кичик корхоналарга зарур товарлар, хизматлар ва ускуналарни импорт қилиш ҳамда ўз маҳсулотларини экспорт қилиш имконини беради.

• ЕТТБ томонидан Ипак Йўли банкига тақдим этилган 10 миллион долларлик молиявий пакет маҳаллий уй хўжаликлари, кичик ва ўрта корхоналар учун яшил технологиялардан фойдаланишни яхшилайди ва аёллар тадбиркорлигини рағбатлантиради.

Бугунги кунга қадар ЕТТБ бутун мамлакат бўйлаб 128 та лойиҳага деярли 3,9 миллиард евро сармоя киритди.