Франциялик мутахассис яна бир бор “Реал”ни бошқариши мумкин.
The Athletic нашрининг хабарига кўра, Зидан нафақат Франция терма жамоаси, балки, “Реал”, “Ювентус” ва “Марсель” жамоалари билан музокаралар ўтказишга очиқ.
Французнинг “Реал”га қайтиши учун шароитларни тўғрилаш керак бўлади. Қолаверса, Мадрид клуби президенти Флорентино Перес ҳам ён босиши керак бўлади.
Агар клуб муваффақиятга эришса ва совринлар учун курашишга тайёр бўлса, Зидан “Марсель”ни ҳам бошқаришга тайёр.
Зинедин бир неча бор “ПСЖ”нинг таклифини рад этди. 2022 йил ёзида унинг парижликлар билан ишлашдан бош тортишига Франция терма жамоасини бошқариш имконига эга бўлгани таъсир кўрсатган. Аммо таъкидланганидек, Зидан “Марсель”га бўлган ҳурмати юзасидан “ПСЖ” бошқарувига ўтмайди.
Қайд этиб ўтиш жоиз, Зидан Марселда таваллуд топган ва фаолияти давомида “Кан”, “Бордо”, “Ювентус” ва “Реал”да тўп сурган.
Франциялик мутахассис 2021 йил май ойида “Мадрид” клуби бошқарувидан кетганидан сўнг ҳозирчага бирорта клубда иш бошлагани йўқ. У “Реал”да икки марта ишлаган — 2016 йилдан 2018 йилга қадар ва 2019 йилдан 2021 йилга қадар. Зидан қўл остида “қаймоқранглилар” уч марта Чемпионлар Лигасида, икки мартадан Ла Лигада, УЕФА Суперкубогида, Испания Суперкубоги ва клублар ўртасидаги Жаҳон чемпионатида зафар қучган.
Изоҳ (0)