Ўзбекистонда тўланган кешбэклар 773 млрд сўмдан ошди

Ўзбекистонда истеъмолчиларга тўланган кешбэклар миқдори 773 миллиард сўмдан ошди. Бу ҳақда Давлат солиқ қўмитаси хабар бермоқда. 

Қайд этилишича, 2022 йил декабрь ойи учун 1,7 млн нафар истеъмолчига 127,4 млрд сўм кешбэк тўланган. Бу эса йил давомида қайд этилган энг юқори кўрсаткич.

Маълумотларга кўра, айни пайтда 1 миллиондан ортиқ фуқарога 63,1 миллиард сўм тўланган.

Ноябрь ойида тўлаб берилган кешбэклар миқдори 85,9 млрд сўмни ташкил қилган. Сентябрь ойида ҳам 1,2 млн нафар истеъмолчига 90,5 млрд сўм миқдорида кешбэк тўлаб берилган эди. Декабрь ойига қадар бу рекорд даража бўлган.

Белгиланган тартибга кўра, декабрь ойи учун истеъмолчиларга 63,1 млрд сўм миқдоридаги нақд пул маблағлари тасдиқланди. Нақд пулнинг қолган қисми солиқ декларацияси тақдим этилгандан сўнг тўлаш учун тасдиқланади.

2022 йилда 2 миллионга яқин истеъмолчи 773 миллиард сўм кешбэк олди.

Аввалроқ Ўзбекистонда онлайн кассалар орқали берилган чекларни таҳрирлашга рухсат берилган эди.