Ўзбекистонда сифатсиз бензин сотган ва нархни асоссиз оширган қатор АЁҚШларга бензин харид қилишга чекловлар ўрнатилди

Энергетика вазирлиги Ўзбекистонда сифатсиз бензин сотган ва нархни асоссиз оширган қатор АЁҚШларга бензин харид қилишга чекловлар ўрнатилганини маълум қилди.

Қайд этилишича, ишчи гуруҳ томонидан АЁҚШлар орқали истеъмолчиларга етказиб берилаётган автобензинларнинг тўғри сотилиши, уларни сифат ва миқдор жиҳатдан тўғри сотилиши доимий назорат қилиб борилмоқда.

Хусусан, ой бошидан ўртача кунлик 7137 тоннадан автобензин биржа савдолари орқали сотувга қўйиб борилди. Шунингдек, «Ўзбекнефтгаз» АЖга қарашли барча автомобилларга ёқилғи қуйиш шохобчаларида (АЁҚШ) Аи-80 маркали автобензиннинг 1 литри 5700 сўмдан сотилмоқда.

Ўрганишлар давомида республика бўйича 109 та тадбиркорлик субъектларига тегишли хусусий АЁҚШларда бир қатор қоидабузарликларга йўл қўйилгани (нархни асоссиз равишда ошириб сотиш, камомадга йўл қўйиш, сифатсиз маҳсулот тарқатиш, кам қуйиш ва бошқа ҳолатлар) аниқланди.

Жумладан, Андижон вилоятида 4 та, Бухоро вилоятида 8 та, Жиззах вилоятида 4 та, Қашқадарё вилоятида 19 та, Қорақалпоғистон Республикасида 5 та, Наманган вилоятида 4 та, Самарқанд вилоятида 26 та, Сурхондарё вилоятида 1 та, Тошкент вилоятида 5 та, Тошкент шаҳрида 7 та, Фарғона вилоятида 22 та ҳамда Хоразм вилоятида 4 тани ташкил қилади.

Хусусан:

• Андижон вилояти Избоскан туманида жойлашган «Ravon oil Texservise» МЧЖга қарашли АЁҚШда Аи-92 русумли автобензиннинг сифати бузилгани, Аи-80 русумли автобензин нархини ошириб сотилаётгани (7 000 сўм);
• Қўрғонтепа туманида жойлашган «Буюк Қўрғон» хусусий корхонасига қарашли АЁҚШда Аи-92 русумли автобензиннинг сифати бузилгани;
• Хўжаобод туманида жойлашган «Vodiy trans oil» МЧЖга қарашли АЁҚШда Аи-80 русумли автобензин нархини ошириб сотилаётганлиги (7 000 сўм) ва Аи-92 русумли автобензин сифати бузилгани аниқланди.
• Хоразм вилояти Боғот туманида жойлашган «Ширин» хусусий корхонасига қарашли АЁҚШда Аи-92 (5 001 литр) русумли автобензин сифатсиз эканли;
• Тупроққалъа туманидаги «Автогаз Муқаддас» МЧЖга қарашли АЁҚШда Аи-80 русумли автобензинни кам қуйиш ҳолати;
• Наманган вилоятида Уйчи туманидаги «Давр плюс» МЧЖ ва Учқўрғон туманидаги «Furqatjon oil» МЧЖларга қарашли АЁҚШларда сотилаётган Аи-92 русумли автобензин сифатсиз экани аниқланди.

Ҳозирда ишчи гуруҳлар томонидан жойларда назорат тадбирлари давом эттирилмоқда.

«Шу ўринда хусусий АЁҚШ фаолияти билан шуғулланувчи тадбиркорлардан нархларни сунъий равишда оширмасликларини, автобензиннинг сифат ва миқдор жиҳатидан тўғри сотишларини сўраймиз», — дейилади вазирлик хабарида.