Бурун битиши кўп сабабларга боғлиқ: шамоллаш, грипп, аллергия ва бошқалар. Бу ҳолат жуда кўп ноқулайликларни келтириб чиқаради, аммо уй шароитида симптомларни енгиллаштиришнинг оддий усуллари мавжуд, деб ёзади «Новий очаг».
Ҳақиқатан ҳам бурун битишига нима сабаб бўлади? Шамоллаш ёки аллергияда, бурун бўшлиғининг шиллиқ қавати яллиғланади. У безовта қиладиган ҳар қандай нарсадан, масалан, аллергендан қутулиш учун у кўпроқ шилимшиқ ажрата бошлайди.
Ингаляцияни амалга оширинг
Иссиқ душ ёки бир пиёла чой бўладими, буғ шилимшиқни суюлтириб, бурундан чиқиб кетишига ёрдам беради. Ноқулайликни тезроқ бартараф этиш учун буғ ингаляциясини амалга ошириш мумкин. Бунинг учун катта идишга қайноқ сув қуйиб, юз атрофи сочиқ билан ёпилади, идишга эгилиб, буғдан нафас олинади. Жараённи кунига уч-тўрт марта такрорлаш мумкин.
Иссиқ душ қабул қилиш ҳам яллиғланишни камайтиришга ва нафас олишни камида бир муддат тиклашга ёрдам беради. Худди шу натижага раковинадаги иссиқ сув буғидан нафас олиш орқали эришиш мумкин:
- Раковинада иссиқ сув ёқилади.
- Ҳарорат етарлича иссиқ бўлганда, юз атрофи сочиқ билан ёпилади.
- Буғдан бир неча марта чуқур нафас олинади. Иссиқ сув буғи юзни куйдирмаслиги учун эҳтиёт бўлиш керак.
Кўпроқ суюқлик ичинг
Агар шамоллаш ёки гриппга ўхшаш аломатлар бўлса, кўп суюқлик ичиш тавсия этилади. Суюқлик даражасини меъёрда сақлаб туриш бурун бўшлиғидан шилимшиқни тозалашга ёрдам беради ва унинг битиб қолишини енгиллаштиради. Бурун битишининг камайиши яллиғланишнинг тузалаётганидан дарак беради.
Агар томоқ оғриғини бошдан кечираётган бўлсангиз, чой ва бульон каби иссиқ суюқликлар ноқулайликни енгиллаштиришга ёрдам беради.
Ҳаво намлантиргичдан фойдаланинг
Ҳаво намлантиргич оғриқ ва бурун битишидан халос бўлишнинг тез ва осон усулидир. Қурилма сувни намликка айлантиради, у аста-секин ҳавони кислород билан тўйинтиради, хонадаги намликни оширади. Нам ҳаводан нафас олиш бурунга битиш хусусиятини берувчи тўқималарни ва яллиғланган қон томирларини тинчлантириши мумкин.
Ялпизли чой ичинг
Ялпиз ва унинг асосий фаол моддаси ментол бўлиб, у нафас йўлларидан шиллиқ қаватни тозалашга ёрдам беради. Ялпиз кўплаб малҳам ва йўтал томчиларида мавжуд.
Ялпиз чойини ҳам ичиш мумкин. 1 чой қошиқ қуритилган ялпиз бир стакан қайноқ сувда 10 дақиқа давомида димланади. Кунига беш мартагача бир стакандан ичиш тавсия этилади.
Мавзуга доир:
Изоҳ (0)