Нима учун озиқ-овқат маҳсулотларининг сифати тезда бузилади? Кўпчилик уларни сақлашда бир нечта хатога йўл қўяди, деб ёзади «Lisa.ru».

Музлаткичда кўп нарсаларни сақлаш

Озиқ-овқат маҳсулотлари узоқ вақт яхши сақланиши учун совуқ ҳаво музлаткич ичида яхши айланиши керак. Шунинг учун уларни зич жойлаштириб бўлмайди. Биринчидан, улар яхши совимайди, иккинчидан, музлаткич янада кўпроқ электр энергиясини истеъмол қилади. Музлаткич ичида бўш жойнинг кўпроқ бўлиши маҳсулотларнинг узоқ вақт яхши сақланишига ҳисса қўшади.

Ҳароратнинг кескин ўзгариши

Кўпгина табиий маҳсулотлар учун барқарор сақлаш шароитлари муҳим аҳамиятга эга. Агар сабзавотлар ҳам бир жойдан бошқа жойга кўчирилса, улар тезда чирий бошлайди. Тухумларга ҳам ҳароратнинг кескин ўзгариши салбий таъсир кўрсатади. Шунинг учун аксарият маҳсулотларни ҳаво беқарор бўлган эшикда сақлаш мумкин эмас.

Қуёш нури

Кўпгина маҳсулотлар қуёш нурини ёқтирмайди. Мисол учун, зираворлар очиқ жавонга қўйилади, лекин уларни ёпиқ эшиклар ортидаги шкафда сақлаган яхшироқ. Сақланадиган жой газ яқинида бўлмаслиги керак. Юқори ҳарорат ҳам салбий омил ҳисобланади.

Нотўғри намлик

Ўта нам шароитда сақлаш кўплаб маҳсулотлар учун мос эмас. Ёрма, ун, туз, шакар, крахмал, чой нам шароитда сақланмайди. Юқори намлик шароитида улар тезда ўз хусусиятларини йўқотади ва истеъмол қилиш учун яроқсиз ҳолга келади.

Барча маҳсулотларни ювиш

Овқат тайёрлашдан олдин сабзавот, кўкат ва меваларни ювиш керак. Аммо айрим уй бекалари уларни харид қилган вақтидаёқ ювишга одатланган. Тозаликка бўлган муҳаббат ажойиб, аммо бундай ёндашув табиат инъомларини ўлдиради. Лекин тухумларни сотиб олгандан сўнг дарҳол ювиш керак, акс ҳолда маҳсулот юзасидаги бактериялар музлаткич бўйлаб тарқалади.

Ёқимсиз ҳидлар

Аксарият маҳсулотлар ҳидни яхши ўзлаштиради. Агар балиқ ёки бошқа ҳидли маҳсулот бир пакет чой ёнига қўйилса, ичимлик ғалати таъмга эга бўлади. Шунинг учун бундай маҳсулотларни ёмон ҳид манбасидан узоқроқ жойда сақлаш яхшироқдир.