Интеллектуал мулк агентлиги томонидан ўтказилган «Бест ИП-2022» танловида Ветеринария илмий-тадқиқот институтининг модели ғолиб бўлди. Бу ҳақда Адлия вазирлиги ахборот хизмати «Дарё»га маълум қилди.
Айтилишича, мазкур танлов ҳар йили анъанавий тарзда ўтказиб келинади. Жорий йил учун 26 та ишланма тақдим этилган. Улар орасидан бруцеллёз антигени ва уни олиш усули номли лойиҳа энг яхши фойдали модель деб топилган.
«Мазкур антиген инсонларга ҳайвонлардан юқадиган ўта хавфли бруцеллёз касаллигини ҳайвонларда тезкор ташхис қўйиш тести ҳисобланади. Бундан ташқари Ўзбекистонга импорт ўрнида келтирилаётган ушбу антигенларнинг бемалол ўрнини боса олади ва тўлиқ маҳаллий хом-ашё ҳисобидан ишлаб чиқарилади яъни катта миқдордаги республика бюджет маблағлари иқтисод қилинади», — деди Ветеринария илмий тадқиқот институти директори Бозорбой Элмуродов
Ғолиб базавий ҳисоблаш миқдорининг 25 баравари (7 миллион 500 минг сўм) миқдорида пул мукофоти билан тақдирланган. Шунингдек, Наманган муҳандислик-технология институти иккинчи ўринни, Фанлар академиясининг Микробиология институтининг ишланмаси учинчи ўринга лойиқ кўрилган.
Изоҳ (0)