Европа Иттифоқи саммити иштирокчилари Россия газ нархининг юқори чегарасини белгилаш ва умумий ёқилғи сотиб олиш тамойили бўйича келиша олмади. Бу ҳақда «РБК» хабар бермоқда.
Европа Кенгаши вакили Баренд Лейц томонидан эълон қилинган саммитнинг якуний баёнотида қарор қабул қилиш 19 декабрга қолдирилгани айтилади. Шу куни Европа Иттифоқи энергетика вазирлари йиғилиши бўлиб ўтади.
«Европа Кенгаши 19 декабрь куни бозорни тузатиш механизмини яратувчи Кенгаш резолюцияси устида ишлашни якунлашга чақиради», — дейилади ҳужжатда.
Россия гази учун нарх чегарасини белгилаш шу ҳафтада аллақачон муҳокама қилинган — Венгрия ташқи ишлар вазири Петер Сиярто 13 декабрь куни айтганидек, баҳс ЕИ Энергетика кенгаши йиғилишида бўлиб ўтди.
Бироқ ҳеч қандай келишувга эришилмади. Унинг олдинги йиғилиши 24 ноябрь куни бўлиб ўтган, бироқ ўшанда ҳам давлатлар умумий фикрга кела олмаган эди.
Аввалроқ Европа Иттифоқининг 12 та давлати Россия гази нархининг юқори чегарасини камайтиришни талаб қилгани ҳақида хабар берилганди.
Европа комиссияси таклиф қилган режага кўра, агар Амстердам фонд биржасида газ нархи камида икки ҳафта давомида 1 МВт/соат учун 275 евродан (1 000 куб метрга тахминан 3 000 доллар) ошса, чеклов кучга киради.
Бунинг учун LNG нархи билан фарқ камида ўн кун давомида 58 евродан ошиши керак.
Изоҳ (0)