Сурхондарёда 3 млрд сўмдан ортиқ қарздорлиги бўлган ғишт заводи электр энергияси тармоғидан узилмагани аниқланди

Сурхондарё вилоятининг Қизириқ тумани электр таъминоти корхонасининг энергия сотиш бўйича бошлиқ ўринбосарига нисбатан жиноят иши қўзғатилди.

Вилоят прокуратураси матбуот хизматининг маълум қилишича, у мансаб ваколатидан қасддан фойдаланиб, «Евроазия шифер» МЧЖга қарашли ғишт ишлаб чиқариш заводида электр тармоқларидан ноқонуний фойдаланиши оқибатида жами 474 миллион 831 минг 400 сўм миқдорда зарар етказилгани аниқлаган бўлса-да, етказилган моддий зарарни ўрнини қоплаш чораларини кўрмаган.

2022 йил 1 декабрь ҳолатига кўра 3 миллиард 24 миллион 662 сўмлик қарздорлиги мавжуд бўлса-да, электр энергияси тармоғидан узмасдан жамият ва давлат манфаатларига жуда кўп миқдорда зарар етказилишига сабабчи бўлган.

Мазкур ҳолат юзасидан 12 декабрь куни Иқтисодий жиноятларга қарши курашиш департаментининг вилоят бошқармаси томонидан Жиноят кодексининг 205-моддаси 2-қисми «а» банди билан жиноят иши қўзғатилиб, ҳозирда дастлабки тергов ҳаракатлари олиб борилмоқда.

Бундан аввал Сурхондарёнинг Шеробод, Музработ ва Узун тумани электр таъминоти корхонаси раҳбарларига нисбатан жиноят иши қўзғатилгани ҳақида хабар берилган эди.

Мавзуга доир:

• Андижондаги корхона 6 мингта хонадоннинг бир ойлик истеъмолига тенг электр энергиясидан ноқонуний фойдаланиб келгани аниқланди
• Олмалиқдаги корхона 5 мингга яқин хонадоннинг бир кунлик истеъмолига тенг газдан ноқонуний фойдалангани аниқланди