«Толибон» матбуот котиби Забиҳуллоҳ Мужоҳид 15 декабрь куни чегарадаги можаро Покистон ҳарбийлари томонидан бошланганини маълум қилди. Бу ҳақда Hasht-e Subh Daily хабар берди.
Мужоҳид Twitter’даги саҳифасида Покистон аскарлари Афғонистоннинг Спинболдак туманида отишма содир этиб, жанг бошлаганини ёзди. У «Толибон» ҳар қандай муаммони мулоқот йўли билан ҳал қилиши, салбий ҳаракатлар ва урушни баҳона қилиш томонларнинг ҳеч бирига манфаатдор эмаслигини билдирди.
Эслатиб ўтамиз, 15 декабрь куни Қандаҳорнинг Спинболдек шаҳрида «Толибон» ва Покистон кучлари яна тўқнашди. Манбаларга кўра, бу можаро «Толибон» бу ҳудудда назорат-ўтказиш пункти ўрнатмоқчи бўлганидан кейин бошланган. Аммо Покистон ҳарбийлари бунга қаршилик қилган. Ҳодиса оқибатида 1 киши ҳалок бўлгани, 15 киши эса яралангани айтилмоқда. Покистон «Толибон» артиллериядан тинч аҳолига қарата ўқ узгани акс этган видеони эълон қилган.
Кобулдаги Покистон элчихонаси ходимлари ва Афғонистон билан чегара яқинида жойлашган аҳоли эвакуация қилинган. Томонлар ўртасидаги отишма давом этмоқда.
Эслатиб ўтамиз, 11 декабрда ҳам «Толибон» ва Покистон ҳарбийлари ўртасида тўқнашув юз берганди. Тўқнашув «Толибон» чегара кучлари Дуранд линияси яқинида янги пост қуришни режалаштирганидан кейин бошланган.
Изоҳ (0)