«Дарё» нашри 15 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
АҚШ Киевга ўқ-дориларни «ақлли» бомбага айлантирадиган ускуналарни жўнатмоқчи — WP
АҚШ президенти маъмурияти бошқарилмайдиган авиация ўқ-дориларини «ақлли» бомбага айлантирувчи ускунани Украинага юборишни режалаштирмоқда, деб ёзади The Washington Post Американинг юқори мартабали расмийларига таяниб.
Газета манбаларига кўра, гап GPS Joint Direct Attack Munition (JDAM) технологиясига асосланган, турли хилдаги қуролларга бириктирилиши мумкин бўлган ускуналар тўплами ҳақида кетмоқда. Аввал АҚШ армияси ушбу технологияни бомбардимончи ва қирувчи самолётларда қўлланиладиган бомбалар учун ишлатган.
The Washington Post таъкидлашича, АҚШ президенти Жо Байден ёки унинг миллий хавфсизлик бўйича бош маслаҳатчиларидан бирортаси JDAM’ни Украинага юбориш ғоясини маъқуллаганми-йўқми, ҳозирча номаълум.
Си Цзиньпин Россия билан муносабатларни мустаҳкамлаш ҳақида буйруқ берган — WSJ
Хитой етакчиси Си Цзиньпин жамоатчилик майдонида Россиядан «узоқлашиш»га уринаётганига қарамай, ҳукуматга Москва билан яқинроқ иқтисодий алоқалар ўрнатиш бўйича кўрсатма берган. Бу ҳақда The Wall Street Journal «Пекин сиёсий маслаҳатчилари»га таяниб хабар бермоқда.
Нашр манбаларига кўра, Хитой ва Россия ўртасидаги иқтисодий алоқаларни кенгайтириш режаси Россиядан нефть, газ ва қишлоқ хўжалиги маҳсулотлари импортини оширишни ўз ичига олади.
Бундан ташқари, Пекин Арктикада Москва билан энергетика соҳасидаги ҳамкорликни кенгайтириш, шунингдек, Россия инфратузилмасига, хусусан, темир йўл ва портларга сармоя киритишни кўпайтириш ниятида.
Россиянинг Украинадаги босқини бошланганидан кейин Хитой Москвага қарши санкциялар киритмади ва Ғарб давлатларининг бундай чораларини қоралади.
Илон Маск унинг самолётини кузатган Twitter фойдаланувчисини судга берди, у Билл Гейтс ва Путиннинг парвозларини ҳам кузатиб борган
Twitter ижтимоий тармоғи эгаси, Tesla ва SpaceX асосчиси Илон Маск @ElonJet Twitter-аккаунти эгаси, 20 ёшли Жек Суинини судга берганини маълум қилди. У бизнесмен самолётининг ҳаракатлари ҳақида ахборот эълон қилган.
Маскнинг сўзларига кўра, яқинда Лос-Анжелесда бўлиб ўтган воқеадан кейин у судга мурожаат қилган. У ерда «ақлдан озган сталкер» бизнесменнинг ўғлини бироз вақт давомида таъқиб қилган — уни Илон Маск деб ўйлаган.
Ҳодисадан кейин Маск Twitter’да фойдаланувчиларнинг жойлашган жойи ҳақида реал вақт режимида маълумот берувчи ҳар қандай ҳисоб ёпиб қўйилишини, чунки бу одамларнинг жисмоний хавфсизлигига таҳдид солишини маълум қилди.
Маск судлашмоқчи бўлаётган Жек Суинининг ўзи BBC News’га маълум қилишича, унинг бизнесменнинг ўғли билан юз берган воқеага алоқаси йўқ.BBC News ёзишича, Суини Microsoft таъсисчилaридан бири Билл Гейтс, Amazon асосчиси Жефф Безос ва Меtа бош директори Марк Цукерберг каби машҳурларнинг парвозларини кузатиб борган бошқа ўнлаб аккаунтларга ҳам масъул бўлган.
Бундан ташқари, Суини Россия президенти Владимир Путин учган эҳтимолий самолётларни ҳам кузатган. Бу аккаунтларнинг аксарияти ҳам блоклаб қўйилган.
Ўзбекистонликлар дам олиш учун энг кўп қаерга бораётгани маълум қилинди
Давлат статистика қўмитаси маълумотларига кўра, 2022 йилнинг 10 ойида 558,6 минг нафар Ўзбекистон фуқароси дам олиш ва ҳордиқ чиқариш учун хорижга чиқди. Ва саёҳатларнинг энг кўп қисми яъни 200 мингдан ортиқ нафари Туркия давлатига тўғри келмоқда.
Айни вазиятда Ўзбекистоннинг Истанбул шаҳридаги бош консулхонаси Туркияда истиқомат қилаётган ўзбекистонликга огоҳлантириш билан чиқди.
«Ҳурматли ватандошлар! Шахсий ҳавфсизлигингизга эътиборли бўлган ҳолда сизлардан турли хилдаги кўпсонлик йиғилиш ва намойишларда иштирок этмаслик ҳамда уларда қатнашишга даъват этиш орқали тарғибот юритмасликка чақириб, бундай ҳаракатлар қонуний жавобгарликка тортилишга сабаб бўлиши ҳақида огоҳлантирамиз», — дейилади бош консулхона матбуот хизмати томонидан эълон қилинган огоҳлантиришда.
Изоҳ (0)