НАТО бош котиби ўринбосари Мирча Жоаненинг айтишича, альянс Молдовага миллий хавфсизликни янада мустаҳкамлашда ёрдамни давом эттиради. Бу ҳақда «Интерфакс» хабар бермоқда.
«НАТО учун Молдова жуда муҳим ҳамкор. НАТО Молдованинг миллий хавфсизликни мустаҳкамлашда қўшимча ёрдам ҳақидаги сўровини ниҳоятда жиддий қабул қилади. Орамизда кучли ҳамкорлик мавжуд,ва қийин пайтларда бу янада кучлироқ бўлади», — деди Жоане Кишинёвда «Ўзгарувчан хавфсизлик муҳитида НАТО ҳамкорлигини ривожлантириш» (Developing NATO Partnerships in a Changing Security Environment) халқаро конференциясида.
Унинг таъкидлашича, «Молдованинг НАТО билан ҳамкорлиги республиканинг бетарафлик мақомига риоя қилишини ҳисобга олган ҳолда амалга оширилади».
Конференцияда Молдова мудофаа вазири Анатолий Носатий мудофаа салоҳиятини ошириш ташаббуси (DCBI) доирасида иттифоқчилар билан халқаро ҳамкорлик ва Миллий армияни модернизация қилиш бўйича тақдимот қилди. Тадбирдан кўзланган мақсад Молдова республикаси ва НАТО ўртасида шериклик соҳасидаги ютуқларни таҳлил қилиш ва ушбу ҳамкорлик истиқболларини муҳокама қилишдан иборат эди.
Аввалроқ Молдова президенти Майя Санду мамлакатнинг НАТОга кириш нияти ҳақида гапирганди. Мамлакатда ноябрь ойида ўтказилган ижтимоий сўров натижаларига кўра, фуқароларнинг 54,5 фоизи ҳарбий блокка қўшилиш учун овоз берган.
Изоҳ (0)