Жорий йилнинг август ойидан бошлаб Покистон ҳалокатли даражага етган сув тошқинлари оқибатида маҳаллий экинларнинг нобуд бўлиши сабабли Ўзбекистондан пиёз импорт қила бошлади. Бу ҳақда EastFruit хабар бермоқда.
Агар август ва сентябрь ойларида Ўзбекистондан Покистонга пиёз етказиб беришнинг ойлик ҳажми уч минг тоннадан ошмаган бўлса, октябрь ойида бу кўрсаткич аввалги икки ойга нисбатан бир неча баробар ошди.
2022 йил ноябрь ойида Покистон ҳам ўзбек пиёзининг асосий харидори бўлиб қолди. Дастлабки расмий статистик маълумотларга кўра, 2022 йил ноябрь ойида Ўзбекистон 10,4 минг тонна янги пиёз экспорт қилган ва бу ҳажмнинг 96 фоизи Покистонга тўғри келади.
Шу билан бирга, 2022 йилнинг августидан ноябригача Покистоннинг ўзбек пиёзининг умумий экспортидаги улуши ойдан ойга ошди: августда — 70 фоиз, сентябрда — 79 фоиз, октябрда — 87 фоиз, ноябрда эса — 96 фоиз.
2022 йил октябрь ойида Ўзбекистондан Ироққа пиёз экспорти ҳажми 560 тоннани (умумий экспортнинг 5 фоизини), ноябрда эса 140 тоннага яқинни (1 фоиз) ташкил этди.
Бундан ташқари, 2022 йил ноябрь ойида Ўзбекистон Афғонистонга салкам 200 тонна пиёз жўнатди, бу жорий ойдаги умумий экспорт ҳажмининг 2 фоизини ташкил этади.
2022 йил ноябрь ойида Ўзбекистондан пиёз экспорти географиясига эътибор қаратадиган бўлсак, бу маҳсулотларнинг 99 фоизи уч давлат — Покистон, Ироқ ва Афғонистонга жўнатилган. Қолган 100 тоннага яқини Қозоғистон (89 тонна) ва Қирғизистонга (11 тонна) тўғри келди.
Изоҳ (0)