Энергетика вазирлиги матбуот хизматининг маълум қилишича, ўз вазифасига масъулият билан ёндашмаган корхоналар раҳбарларига ҳайфсан берилди.
Қайд этилишича, 7 декабрь куни вазирликда Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари, шунингдек, прокуратура органлари ҳамда тизим корхоналари раҳбарлари ва масъул ходимлари иштирокида куз-қиш мавсумини беталафот ўтказиш бўйича тузилган махсус штабнинг навбатдаги йиғилиши бўлиб ўтди.
Унда ҳозирги кунда энергия ресурслари таъминотидаги мавжуд муаммолар ва уларнинг ечимлари, бу борада олиб борилаётган ишлар танқидий кўриб чиқилди. Йиғилишда махсус штаб ташкил этилганига қарамай, жойлардаги ҳудудий штабларнинг фаолияти талаб даражасида ташкил этилмаганига алоҳида урғу берилди.
Айрим масъул раҳбарларнинг долзарб муаммоларни тезкорлик билан бартараф этишда ишларни тўғри ташкил қилмаётгани, бунинг оқибатида тизимда кўплаб техник носозликлар содир бўлаётгани, энергия тежамкорлик масалаларида камчиликларга йўл қўйилаётгани ҳамда электр таъминотида чекловларни киритишда белгиланган тартибларга риоя этилмаётгани истеъмолчиларнинг ҳақли эътирозларига сабаб бўлаётгани танқид қилинди.
Шу ва бошқа камчиликларга йўл қўйгани учун «Ўзбекистон миллий электр тармоқлари» АЖ бошқаруви раиси Дадажон Исакулов, «Ҳудудий электр тармоқлари» АЖ бошқаруви раисининг биринчи ўринбосари Рўзиқул Райимов, «Қашқадарё ҳудудий электр тармоқлари корхонаси» филиали директори Анвар Музапов ва «Тошшаҳарнур» ДУК директори Умидбек Ражабовга ҳайфсан берилди.
Йиғилишда ёқилғи-энергетика тармоғидаги муаммоларни бартараф этишда кўрилаётган чора-тадбирларни виждонан амалга ошириш ва бунинг натижасида истеъмолчиларни барқарор энергия ресурслари билан таъминлаш бош мезон экани, бунда эса соҳада ижро интизоми масаласи ниҳоятда муҳимлиги алоҳида таъкидланди.
Изоҳ (0)