Криштиану Роналду Саудия Арабистони клубига ўтиши билан боғлиқ саволларга жавоб берди

Криштиану Роналду Саудия Арабистонининг «Ан-Насср» жамоасига ўтаётганини рад этди.

Аввалроқ Испаниянинг Marca нашри ҳужумчи 1 январь санасида саудияликлар сафига бориб қўшилиши ва ҳар мавсум учун 200 миллион евро маош олиши ҳақида хабар берганди.

«Йўқ, бу нотўғри. Нотўғри», — дея жавоб берди португалиялик ҳужумчи ЖЧ—2022 1/8 финал босқичи Швейцарияга қарши баҳсдан сўнг. Роналду учрашувда 17 дақиқа майдонда ҳаракат қилди.

Журналист Фабрицио Романо Криштиану ҳақиқатан ҳам «Ан-Насср»дан таклиф олгани, бироқ ҳали ўтишга розилик бермаганини айтиб ўтди.

Роналду Чемпионлар Лигасида иштирок этувчи Европа клубидан таклиф кутмоқда.

37 ёшли футболчи жорий мавсум «Манчестер Юнайтед» ва Португалия сафида 22 ўйинда иштирок этиб, 4 та гол муаллифига айланди.