Бахт — нисбий тушунча, атрофдагиларнинг кўзига бахтли бўлиб кўринадиган инсонларнинг ҳам қандайдир армонлари бўлиши табиий ҳол. Ўзбек санъатига муносиб ҳисса қўшган ва бугунги кунда самарали ижод қилаётган санъат вакиллари орасида ҳам фарзандли бўлишни орзу қиладиганлар бисёр.
Лутфихоним Саримсоқова
Ўзбекистон халқ артисти Лутфихоним Саримсоқовани санъат вакиллари «аяжон» дея хотирлашади. Актриса «Сен етим эмассан» фильмидаги Фотима ролидан кейин томошабинлар тасаввурида ҳам она тимсолида тасвирланиб қолган. Афсуски, актрисага ҳаётда она бўлиш насиб этмаган.У 14 ёшида Тожизода исмли йигитга турмушга чиққан. Оила вакиллари уни илиқ қабул қилишган, аммо санъатга ошуфта эканлигини билгач, унга бўлган муносабатлар ўзгарган.
Турмуш ўртоғи унинг яширинча қўшиқ куйлаётганини эшитиб қолади ва бунга қаршилик кўрсатади. Бир марта қўшиқ куйлагани учун турмуш ўртоғи томонидан жиддий жазоланади ва Лутфихоним Саримсоқованинг акаси келиб, синглисини уйига олиб кетади.
Лутфихоним Саримсоқова ижодда катта муваффақиятга эришган бўлса-да, шахсий ҳаётида бахтга эришмади. У ёши анча улғайганидан сўнг меҳрибонлик уйидан рус қизини асраб олади. Унга Ҳужум деб исм қўяди ва ўзбекона урф-одатлар асосида тарбиялайди.
Мутаваккил Бурҳонов
Ўзбекистон мадҳияси мусиқаси муаллифи, таниқли композитор Мутаваккил Бурҳонов фаолияти давомида кўплаб муваффақиятларга эришган бўлса-да, шахсий ҳаётида бахт топмаган ижодкор ҳисобланади. Ижодкор умри давомида бирор марта оила қурмаган. У умри мобайнида камтарона ҳаёт кечириб, бор эътиборини ижодга қаратган.
Шафоат Раҳматуллаева
Ўзбекистон халқ артисти Шафоат Раматуллаевага ҳам фарзандли бўлиш насиб этмаган. У Сирдарёдаги театрдаги ҳамкасби билан оила қурган. Актриса саккиз йиллик турмушидан сўнг ажрашишга қарор қилган. Балки бу фарзандли бўлмагани билан боғлиқдир. Ажримдан сўнг актриса оила қурмаган ва бор эътиборини ижодига қаратган. У ҳозир ҳам театрда фаолият юритади.
Кумуш Раззоқова
Афсуски, Ўзбекистонда хизмат кўрсатган артист Кумуш Раззоқовага ҳам фарзандли бўлиш насиб этмаган. У таниқли бастакор Владимир Барамиков билан оила қурган ва 20 йиллик турмуши давомида бахтли ҳаёт кечирган. Тақдир тақозоси билан бу жуфтлик фарзанд кўрмаган.
Зуҳра Солиева
2022 йилда 50 ёшни қаршилаган актриса Зуҳра Солиева ҳам шахсий ҳаётидан бахт топмаган. У жуда кеч оила қурган, аммо турмуши давомида фарзандли бўлолмаган.
Фарзандсизликдан сўнг у турмуш ўртоғи билан ажрашган. Аммо оиланинг ажрашувига фақат бефарзандлик сабаб деб бўлмайди. Чунки актриса турмуши давомида зўравонликка учрагани ва собиқ эри ундан молиявий мақсадда фойдалангани ҳақида сўзлаб берганди.
Самардар Ҳамроқулов
Хонанда Самандар Ҳамроқулов 2007 йилнинг 10 август санасида Дилноза исмли қиз билан оила қурган. Ҳозирча улар фарзанд кўргани йўқ. Аммо хонанда интервьюларида фарзанд кўриш умидини узмаслиги ва аёли билан бахтли яшаётгани ҳақида айтиб ўтганди.
Бону
«Қора тун» ва «Афсона» қўшиқлари билан танилган хонанда Бону ҳам ҳозирча фарзандли бўлгани йўқ. У интервьюларининг бирида ҳомиласи нобуд бўлгач тушкунликка тушиб қолгани ва қачонлардир Яратган унга ҳам фарзанд беришидан умидвор эканлиги ҳақида айтиб ўтган.
Мавзуга доир: