Туркманистонда ватанпарварлик қўшиқлари садоси остида наркотиклар ва контрабанда тамаки маҳсулотлари ёқиб юборилди, деб хабар беради «Хроника Туркменистана».

Наркотик воситалар ва контрабанда тамаки маҳсулотларини йўқ қилиш бўйича акция Ахал вилояти Гокдепа туманида жойлашган махсус мажмуада бўлиб ўтди. Тадбирда парламентнинг иккала палатаси раҳбарлари, ҳукумат, давлат хавфсизлик кенгаши аъзолари, жамоатчилик ташкилотлари, соғлиқни сақлаш соҳаси, оммавий ахборот воситалари вакиллари, оқсоқоллар иштирок этди.

Йиғилганларга мусодара этилган наркотик моддалар, контрабанда тамаки ва фармацевтика буюмларини йўқ қилиш жараёни намойиш этилди, шундан кейин қадоқланган қоплар бирма-бир махсус печлар ўтхонасига юборилди.

Ҳуқуқ-тартибот органлари назорати остида қопларни йўқ қилишда исталган киши қатнашиши мумкин бўлди.

Бутун жараён Туркманистон Ички ишлар вазирлиги мусиқий коллективи ижросидаги ватанпарварлик қўшиқлари садоси остида бўлиб ўтди.

Айнан қанақа наркотиклар ва қанча миқдорда йўқ қилинганига аниқлик киритилмади.

Тадбирдан кейин иштирокчиларга ИИВ Исковуч итлар марказининг наркотикларни қидирувчи алабай итлари намойиш қилинди.

Таъкидланишича, бундай акциялар ҳукумат томонидан ҳар йили бир марта ўтказилади. Ўтган йили наркотиклар 25 декабрда ёндирилган.

2020 йил декабрида Туркманистон президенти Гурбангули Бердимуҳамедов Ашхободдан 100 километр шимолда жойлашган наркотикларни ёқиш учун янги мажмуани очиб берганди. Ўшанда у контрабанда йўли билан олиб келинган гиёҳванд моддаларни махсус печда йўқ қилиш тадбирида қатнашган, тадбир чоғида жами 122,5 кг наркотик моддалар йўқ қилинган эди.