Ўзбекистонда изғирин совуқ ҳафта охиригача сақланиб қолади

«Ўзгидромет» иш ҳафтаси учун об-ҳаво прогнозини эълон қилди.

Унга кўра, 5 декабрь, душанба куни Ўзбекистон бўйича вақти-вақти билан қор ёғади, тоғолди ва тоғли ҳудудларда баъзи жойларда кучли бўлади. Фақат Қорақалпоғистон Республикаси, Хоразм, Бухоро, Навоий вилоятларида кам булутли ва қуруқ об-ҳаво кузатилади. Ҳаво ҳарорати кундузи 3 даража совуқ – 2 даража илиқ, шимолда 4-9 даража совуқ бўлади.

Сешанба куни фақат республиканинг шарқий ҳудудларида беқарор об-ҳаво сақланиб туради. Ўзбекистон бўйича ёғингарчилик кутилмайди, фақат Фарғона водийси вилоятларида, шунингдек, тоғолди ва тоғли ҳудудларда кечаси ва куннинг биринчи ярмида қор ёғади. Ҳаво ҳарорати кечаси 5-10 даража совуқ, кундузи 3 даража совуқ –  2 даража илиқ, республиканинг шимолий ҳудудларида кечаси 13-15 даража совуқ, баъзи жойларда 20 даражагача совуқ, кундузи 4-9 даража атрофида совуқ бўлади.

Сўнг иш ҳафтасининг охиригача Ўзбекистон бўйича ёғингарчиликсиз об-ҳаво бўлиши кутилмоқда, фақат республиканинг жануби-шарқий ҳудудларида, асосан тоғолди ва тоғли ҳудудларда 7—8 декабрь кунлари баъзи жойларда бироз қор ёғади. Ҳаво ҳарорати кечалари 3-8 даража, баъзи жойларда 10 даражагача совуқ, кундуз кунлари 3 даража совуқ – 2 даража илиқ бўлади.

Республиканинг шимолий ҳудудларида эса кечаси 8-13 даража, баъзи жойларда 15-20 даражагача совуқ, кундуз кунлари 2-7 даража совуқ бўлади.

Ўзбекистон бўйича айрим жойларга туман тушади, йўлларда яхмалак юзага келади.

Шу сабабли «Ўзгидромет» иссиқроқ кийинишни, шунингдек, йўлларда эҳтиёт чораларини кўришни тавсия этди.