Коронавируснинг юқумлилик даражаси юқори бўлган штамми — «сербер» Қозоғистонда ҳам аниқланди. Бу ҳақда Коронавирус тарқаилишига йўл қўймаслик бўйича идоралараро комиссия мажлисида маълум қилинди, деб ёзади Tengrinews.
Таҳлилларга кўра, мамлакатда коронавирус ҳолатларининг 0,5 фоизи «омикрон» штаммининг БҚ.1.1 («сербер») варианти бўлиб чиққан. Қолган 99,5 фоизини эса «омикрон» штаммининг бошқа вариантлари ташкил этади.
Аввалроқ россиялик мутахассислар коронавирус омикрон штаммининг БҚ.1 ва БҚ.1.1 («сербер») вариантларини бошқаларига нисбатан юқумлироқ деб баҳолаган эди. Улар Россияда биринчи марта 26 октябрь куни қайд этилган.
«Улар юқори даражали трансмиссивлиги билан фарқ қилади, яъни одамдан одамга коронавируснинг бошқа вариантларидан ҳам тезроқ юқади», — дея огоҳлантирди идора.
Коронавируснинг БҚ.1.1 «сербер» штамми БА.5 — «омикрон»нинг мутацияга учраган варианти. У сентябрда Европанинг бир қатор мамлакатларида аниқланган бўлиб, янада шиддатлироқ тарқалиши билан ажралиб туради — у «омикрон»дан 20—30 фоизга тезроқ юқади.
Россия Соғлиқни сақлаш вазирлигининг юқумли касалликлар бўйича бош мутахассиси Владимир Чуланов айтишича, «сербер» юқумлироқ бўлгани билан, нисбатан енгилроқ шаклда кечади.
Янги штаммнинг белгилари аввалгиларникидан кўп ҳам фарқ қилмайди ва иситма, йўтал, нафас етишмаслиги, чарчоқ, мушаклардаги оғриқ, таъм ва ҳид сезмаслик, бош оғриғи, томоқ оғриғи, тумов, кўнгил айниши, диареядан иборат.
Шунингдек, унинг оқибатлари ҳам коронавируснинг бошқа штаммларида бўлгани каби уйқу билан боғлиқ муаммолар, соч тўкилиши, хотира билан боғлиқ муаммолар, овқат ҳазм қилиш ва юрак-қонтомир тизимидаги бузилишлар кабилардир.
Изоҳ (0)