Россияда қурилиш соҳасига кадрлар етишмаяпти, руслар бу соҳада ишлашни хоҳламаяпти. Бу ҳақда Спутник хабар берди.
Маълум қилинишича, ҳозирда саноатда зарур ишчилар сонининг деярли 25 фоизи етишмайди, бундай кўрсаткич сўнгги 5 йил давомида кузатилмаган. Малакали муҳандислар тақчил, шу боис қурилиш соҳасида 2021 йил давомида бўш иш ўринлари сони 46 фоизга ошган.
Кадрлар етишмаслиги миллий лойиҳалар доирасида қурилиш ҳажмининг ошиши фонида кузатилмоқда. Таъкидланишича, қурилиш саноати пандемиядан кейин кадрлар тақчиллиги билан курашишга улгурмай, яна кескин муаммога дуч келган. Мамлакатда қисман сафарбарлик эълон қилиниши, айрим мутахассисларнинг хорижга кетиши, шунингдек, меҳнат муҳожирларининг ўз ватанига қайтиши Россияда ҳам ишчи кучига бўлган талаб ортиб бораётгани сабабли вазиятни ёмонлаштирган. Масалан, Россиянинг айрим компаниялари инвестиция лойиҳаларини МДҲ мамлакатларига ўтказган, бу эса ушбу республикаларда муҳандис ва ишчиларга талабнинг ошишига олиб келди.
2022 йилнинг иккинчи чорагида Россияга ишлаш учун 3,12 миллионга яқин муҳожир борганди, бу 2021 йилга нисбатан рекорд кўрсаткич. Энг кўп мигрантлар Ўзбекистондан ташриф буюрганди.