МИБ ноқонуний бўшатилган ходимларни ССВ ва Сирдарё вилояти ҳокимлигига қайта ишга тиклай олмаяпти

Мажбурий ижро бюроси ишдан ноқонуний бўшатилган Бахтиёр Хажиханов ва Руслан Муҳаммадиевни Соғлиқни сақлаш вазирлигига ҳамда Абдурауф Тожиевни Сирдарё вилояти ҳокимлигига ишга тиклашни пайсалга солмоқда.

Бундан икки йил аввал Соғлиқни сақлаш вазирининг тегишли буйруғи билан вазирликнинг Комплеанс, ички аудит ва молиявий назорат хизмати бошлиғи Бахтиёр Хажиханов ишдан олинган эди. Октябрь ойида Олий суднинг такрорий кассация судлов ҳайъати қарорига кўра, ССВдан ноҳақ бўшатилган собиқ ходим Бахтиёр Хажиханов ўз ишига тикланадиган ва унга етказилган моддий зарар (мажбурий прогул суммаси) ундириб бериладиган бўлган эди.

ССВ томонидан ноқонуний бўшатилган фуқаро Руслан Муҳаммадиев ҳам сентябрь ойида Олий суд томонидан Соғлиқни сақлаш вазирилигининг Юридик бўлим бошлиғи лавозимига тиклаш ҳақида қарор қабул қилган эди.

Юқорида зикр этилган иккала фуқаро суд қарорини Мажбурий ижро бюросининг Шайхонтоҳур туман бўлимига ўз вақтида топширган бўлса-да, бугунгача ходимлар ўз ишига тикланмаган.

Яна бир ҳолатда — октябрь ойида Олий суд Сирдарё вилояти ҳокимлиги Молия бошқармаси бошлиғи лавозимида ишлаб, ноҳақ судланиб кейин оқланган Абдурауф Тожиевни ўз лавозимига қайта тиклаган эди. Аммо Абдурауф Тожиев ҳам ҳалигача ўз ишига қайта тикланмаган.

Абдурауф Тожиевнинг иши юзасидан МИБ ахборот хизматининг «Дарё»га маълум қилишича, ижро ҳаракатлари даврида Бюро томонидан Сирдарё вилоят ҳокимлигига бир неча маротаба ижро иши ижросини таъминлаш юзасидан мурожаат қилинган, лекин амалда ишга тиклаш бажарилмаган. Таъкидланишича, ушбу ижро иши Бюро марказий аппарати томонидан алоҳида назоратга олинган ва ижро ҳаракатлари давом эттирилмоқда.

Кўриниб турибдики, суд қарорини вақтида бажармагани учун МИБ на соғлиқни сақлаш вазирига, на Сирдарё вилояти ҳокимига чора кўрмаган.

Амалдаги Меҳнат кодекси 273-моддасига асосан, ходим билан тузилган меҳнат шартномаси ғайриқонуний равишда бекор қилинганда уни ишга тиклаш тўғрисида суд чиқарган ҳал қилув қарори дарҳол ижро этилиши лозим. Бу қоида Ўзбекистон Фуқаролик процессуал кодексининг 266-моддаси ҳамда «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 8²-моддасида ҳам келтириб ўтилган.

Суд ҳужжатларини ёки Мажбурий ижро бюроси органларининг талабларини узрсиз сабабларга кўра ижро қилмаган мансабдорлар Маъмурий жавобарлик тўғрисидаги кодекснинг 198¹ ва 198²-моддаларига мувофиқ маъмурий жаримага тортилади. Шундан кейин ҳам бу ҳолатлар такрорланадиган бўлса, айбдорларга нисбатан Жиноят кодексининг 232-моддасига асосан жиноий жавобгарлик чоралари кўрилиши мумкин.