Марказий банк 2022 йил 1 ноябрь ҳолатига кўра банкларнинг муаммоли кредитлари тўғрисида маълумот берди.
Унга кўра, банклардаги жами кредит портфели 375,3 трлн сўмгача етган. Бу ўтган ойга нисбатан 12,4 трлн сўмга кўпроқдир.
Октябрь ойида банклардаги умумий муаммоли кредитлар (NPL) миқдори қарийб 968 млрд сўмга камайиб, 16,1 трлн сўмни ташкил қилган.
Июль ойида бу кўрсаткич 250 млрд сўмга, август ойида эса 500 млрд сўмга ошган эди. Сентябрь ойида муаммоли кредитлар камая бошлаган эди — 300 млрд сўмга.
Ўтган ойда умумий кредит портфелидаги NPL улуши 0,4 фоизга тушиб, 4,3 фоиз бўлиб турибди. Муаммоли кредитларнинг кескин камайиши тугатилган банклар — «Туркистонбанк» (619 млрд сўм) ва «Ҳи-теч банк» (109 млрд сўм) ҳисобига содир бўлди.
Банклар орасида NPL миқдори энг кўп «Халқ банк»ида сақланиб қолмоқда ва ўтган ойга нисбатан бироз пасайган — 3,3 трлн сўм.
NPL улуши бўйича энг баланд кўрсаткич «Ўзагроэкспорбанк»да — банкнинг жами кредитлардаги NPL улуши 88,2 фоизни ташкил қилди.
Аввалроқ Ўзбекистон банклари ўн ойда 80 трлн сўмга яқин даромад олгани ҳақида хабар берилган эди. Бу даврда банкларнинг соф фойдаси 8 трлн сўмдан ошган.
Изоҳ (0)