Корея банки ўзининг асосий фоиз ставкасини 25 базавий пунктга — йиллик 3,25 фоизга оширди. Бу ҳақда мамлакат регуляторига таяниб, «Интерфакс» хабар бермоқда.
Шундай қилиб, Марказий банк октябрь ойидаги 50 базавий пункт билан солиштирганда ставкаларни ошириш тезлигини секинлаштирди. The Wall Street Journal томонидан сўровнома ўтказилган 20 та таҳлилчидан 18 нафари ҳам чорак пунктга ўсишни кутган эди.
Жанубий Корея Марказий банки раиси Ри Чанг Ёнг йиғилишдан сўнг сўзлаган нутқида ставкани ошириш бўйича сўнгги қарор бир овоздан қабул қилинганини маълум қилди. Шунингдек, у Жанубий Корея вонининг қадрсизланиши билан боғлиқ рисклар заифлашганини қайд этди.
Айни пайтда, Корея банки бошқарувчилари пул-кредит сиёсатини кучайтириш циклини ҳали якунлашни режалаштирмаяпти.
Бошқарувчилар кенгаши инфляция юқори даражада сақланиб қолаётганлиги сабабли нархлар барқарорлигини таъминлаш мақсадида ставкаларни ошириш сиёсати давом этиши керак, деб ҳисоблайди, — дейилади хабарда.
Иқтисодчилар ҳам Корея банки ставкаларни оширишда давом этишини кутишмоқда. Бироқ, кўпчилик регуляторнинг 2023 йилда йўналишини ўзгартиришини ва иқтисодий ўсишни қўллаб-қувватлаш учун ставкаларни туширишини тахмин қилмоқда.
2022 йилда Жанубий Корея иқтисодиётининг ўсиши 2,6 фоиз, инфляция 5,1 фоиз даражасида бўлиши кутилмоқда.
Аввалроқ Европа Марказий банки асосий ставкани кетма-кет иккинчи марта 75 пунктга оширгани ҳақида хабар берилганди.
Изоҳ (0)