Қалқонсимон безни ҳар ким ўз уйида текшириб кўриши мумкин. Аммо буни қандай қилиб тўғри амалга оширишни ҳамма ҳам билмайди. Қалқонсимон без организмда жуда катта рол ўйнайди, агар унинг фаолиятида камчилик бўлса, жиддий оқибатлар юзага келади. Шунинг учун қалқонсимон безни текшириш кўникмаларини уйда ҳам синаб кўриш тавсия этилади, деб ёзади Wday.
Қалқонсимон безни қандай ташқи белгилар билан текшириш мумкин?
Орган фаолиятида бирор муаммо бўлса, унинг шакли катталашади ва бўйин шакли ўзгаради. Аломатлар ташқи томондан ҳам яққол кўзга ташланади. Қалқонсимон безнинг патологияларида бўйин шакли энига кенгайиб, терида бурмалар ва шиш пайдо бўлади.
Тўғри, фақат шифокор қалқонсимон безни тўғри аниқлаши мумкин. Уй шароитида эса бармоқлар кекирдак минтақасида бўйин юзасига қўйилади ва бир маротаба ютқиниш керак. Одатда палпацияда оғриқ, бирор шакл ёки қаттиқ жой сезилмаслиги лозим.
Қалқонсимон без касалликларининг билвосита белгилари:
- вазн ва иштаҳа ўртасидаги номувофиқлик, қанча кўп овқат истеъмол қилинса ҳам вазн ортмаслиги;
- характердаги ўзгариш, асабийлашиш ёки апатиянинг пайдо бўлиши;
- сурункали чарчоқ;
- тана ҳароратининг 37 дан 37,5 даражагача узоқ муддатли кўтарилиши;
- овоз тембрининг пасайиши, хириллаш;
- тез-тез сабабсиз томоқ оғриғи;
- ҳайз даврининг бузилиши;
- қўл титраши;
- тери қуриши;
- соч тўкилиши.
Ёд танқислиги учун текширувдан ўтиш лозим. Ушбу модданинг етишмаслиги туфайли қалқонсимон без катталашади. Бунинг учун билакка ёд билан 5×5 см ўлчамдаги панжара чизилади. Агар икки соатдан кейин ёзув йўқолса, демак, организмда ёд етишмовчилиги мавжуд.
Қалқонсимон без касалликлари кўпинча ёд танқислиги ёки генетик мойиллиги бўлган одамларда пайдо бўлади. Агар қалқонсимон без муаммоси борлигига шубҳа пайдо бўлса, эндокринологга мурожаат қилиш лозим. Бу шунчаки туйилганми ёки аниқ бир муаммо борми, фақат мутахассис аниқлай олади. Ушбу органни уйда даволаб бўлмайди. Текширувдан ўтгандан сўнг шифокор томонидан даволаниш учун кўрсатма берилади.
Изоҳ (0)