Жаҳон киноси тарихида съёмка майдончасида бир ролни ижро этган актёрнинг бирдан ўзгариб қолиши билан боғлиқ ҳолатлар жуда кўп учрайди. Бунга кўп ҳолларда режиссёр ва продюсернинг актёр билан тортишиб қолиши ёки саломатлигининг ёмонлашиши билан боғлиқ вазиятлар сабаб бўлади. Ўзбек киносида ҳам шунга ўхшаш ҳолатлар бўлганми? «Дарё» мухбири Наргизахон Муродова актёрлари ими-жимида ўзгариб қолган фильм ва сериаллар ҳақида маълумот тўплади.
«Чархпалак»даги лўли Марям — Элмира Раҳимжонова ва Моҳира Нурматова
— «Чархпалак» сериалининг давомида нега суратга тушмаганим ҳақида кўп сўрашади. Аммо ҳамиша аниқ сабабини билмаслигимни айтганман. Яратганнинг ўзи кечирсин-у, аввалдан бизда режиссёр ўзларини худо деб билишарди. Ҳозиргидек режиссёрлар билан ўз дўстидек салом-алик қилинмасди. Уларга актёрларнинг ҳурмати, эътибори ниҳоятда юқори бўлган.
«Чархпалак» сериалининг биринчи мавсумидан кейин мени Собир Назармуҳаммедов режиссёрлигидаги «Чаёнгул» фильмига таклиф қилишди. У плёнкага муҳрланадиган фильм бўлгани учун таклифни рад этолмадим. Раҳматли «Чархпалак» сериали режиссёри Шавкат Жунайдуллаевнинг ёнига бориб: «Катта кинога чақиришди, мени плёнкага олишар экан. Рухсат беринг, бир ойда қайтиб келаман», деганимда рози бўлганди. Лекин мен ўшанда режиссёрнинг нафсониятига тегиб қўйганимни билмагандим.
«Чаёнгул» фильмини суратга олиш ишларидан қайтганимдан сўнг лўли Марям роли бошқа актрисага берилганини айтишди. Ролдан четлатилишимга айримлар ўйлагандек гонорар сабаб бўлмаган. Ролимни қизғанганимдан бир ҳафта касал бўлиб қолганман. Чунки ролни яратиш учун боримни бергандим. Ундан айрилиш менга оғир ботган, — дейди актриса Элмира Раҳимжонова «Дарё»га берган интервьюсида.
«Шайтанат»даги Зайнаб — Наврўза Бийназова ва Раъно Шодиева
Зайнаб ролига журналист Наврўза Бийназова тасдиқланган, аммо суратга олиш жараёнлари бошланганида ролдан воз кечишга қарор қилган. Буни сериалнинг режиссёри ва бадиий раҳбари Ёдгор Саъдиев қуйидагича эслайди.
— Бу масала сабаб юрагим хуруж қилишига озгина қолган. Бу ишланган нарса, мен буни аниқ биламан. Ҳозир гапиришнинг ҳожати ҳам йўқ. Бир куни Зайнаб ролини ижро этаётган Наврўза Бийназова олдимга келди-да, «Мен ҳали турмушга чиқмаганман, у қиз гиёҳванд бўлар экан», деди. Сен сценарийни ўқиган эдинг-ку, десам ҳам ролни рад этди. Ана шундан сўнг менда жуда катта муаммо пайдо бўлди. Очиғини айтсам, ўзи Наврўза Бийназова Зайнаб ролини ўйнашини хоҳламаган эдим. Тоҳир Маликни ҳам ўртага қўшишганидан кейин охири бадиий раҳбар сифатида рози бўлгандим. Кейин бахтимга Раъно Шодиева чиқди, — дейди Ўзбекистон халқ артисти Ёдгор Саъдиев.
Эслатиб ўтамиз, Раъно Шодиева мазкур ролни 19 ёшида ижро этган.
Наврўза Бийназова эса «Сериалдаги Зайнаб ролини Раъно Шодиевадек ижро эта олмасдим», деган фикрда.
«Сериалга менинг ўрнимга Раъно Шодиеванинг келиши жуда муваффақиятли бўлган. Барибир мен Раънодек рол ўйнай олмас эдим. Чунки Раъно профессионал актриса, мен актриса эмасман. Менимча, унинг сериалга келгани жуда яхши бўлди. Сериалдан кетишимнинг сабаби — асосий ишим билан суратга олиш жараёнлари тўғри келмагани. Кейин уйдагилар ҳам сериал эфирга чиққанидан кейин қаршилик қилишган. Бу сериалнинг суратга олинганига 24 йил бўлди, биринчи қисми 1999 йилнинг 15 февралида эфирга чиққан.
Сериалда грим усталари, режиссёрлар алмашган, бунга ҳар хил сабаб бор. Балки бошқалар билан молиявий сабаблар бўлгандир, лекин шахсан менинг кетишимга вақт сабаб бўлган. Гонорар олганман, ҳамма қатори. Мен халқ артисти ёки хизмат кўрсатган артист эмасман, оддий актриса сифатида гонорар олганман.
Бу сериалнинг шунақа шов-шувларга сабаб бўлишига ишонмаганман. Сериални суратга олиш жараёнида ҳақиқатан ҳам бошим ёрилган. Суратга олиш жараёнида тайёргарлик кўрилаётган вақтда мени ертўлага олиб киришда эшик бош билан уриб очилиши керак бўлган. Ўша пайтда Элчинни, яъни Бекзод аканинг ўрнига дублёр ишлаган эди. Эшикни қўли билан очаётган эди, бироқ мотор деган вақтда билмадим, эсидан чиқиб қолдими, мени бошим билан урди. Кейин бошим ёрилган», — дейди Наврўза Бийназова.
«Парихона» сериалидаги Маржона — Феруза Норматова ва Нармин
Сериал ҳали эфир юзини кўрмаган бўлса ҳам, у билан боғлиқ маълумотлар аллақачон томошабинларда қизиқиш уйғотган. Актриса Феруза Норматова сериалнинг ярмида суратга тушиб, уни тарк этгани ва бу ролга унинг қиёфадоши таклиф этилгани ҳам кўплаб шов-шувларга сабаб бўлди.
— Ферузанинг ҳижобга кириб, ролни тарк этишини кутмагандик. Чунки у ролга таклиф этилган пайтда бундай қарори борлигини айтмаганди. Шундан кейин бор кучимизни ишга солиб, Ферузанинг қиёфадоши бўлган ҳаваскор актрисани топдик. Энди суратга олиш ишлари бошланади деб турганимизда у турмушга чиқадиган бўлиб қолди. Бўлажак турмуш ўртоғи эса унинг сериалда суратга тушишини истамади. Ундан кейин Нарминжон тахаллусли актриса билан ишлашга қарор қилдик. Аслида сериал сентябрь ойида эфирга узатилиши керак эди. Аммо роллардан бирига актриса Зарина Низомиддиновани таклиф этганимиз боис эфир вақти яна сурилди, — дейди сериал режиссёри Умид Қўчқоров.
«Жалолиддин Мангуберди» сериалидаги Ширин — Феруза Норматова ва Маҳлиёхон Асқаралиева
Феруза Норматованинг ҳижобга кириб, кинодаги фаолиятини чеклаганидан кейин у иштирок этаётган яна бир сериалга янги актриса олишга тўғри келди. Ёдингизда бўлса, у «Жалолиддин Мангуберди» сериалининг биринчи фаслида Ширин ролини ижро этганди. Сериалнинг иккинчи фаслида бу ролни Маҳлиёхон Асқаралиева ижро этади. Қизиқ, Шириннинг янги қиёфаси аввалгисидан қанчалик фарқ қиларкан?
«Тилим қурсин» фильмида Алишер Отабоевнинг аёли нега ўзгариб қолган?
Режиссёр Жаҳонгир Аҳмедов томонидан суратга олинган «Тилим қурсин» фильмида ҳам актрисанинг ўзгариши билан боғлиқ ҳолат содир бўлган. Аммо буни кўпчилик томошабинлар пайқамаган. Яъни «Тилим қурсин» фильмида Алишер Отабоевнинг аёли ролини бошқа актриса ижро этган.
«Тилим қурсин-2» фильмида эса Алишер Отабоевнинг турмуш ўртоғини актриса Хосият Ҳусанова ижро этган. Назаримизда, режиссёр аввалига фильмнинг давомини суратга олишни ва унда Асқар Ҳикматовнинг онаси ролини ижро этган актриса муҳим аҳамиятга эга эканлигини ҳисобга олмаган. Хосият Ҳусанова эса бирдан бойиб кетган аёл ва қаттиққўл қайнона ролини маромига етказиб ижро этган.
«Тоҳир ва Зуҳра» фильмида — Зуҳранинг роли нега модель қизга берилган?
1999 йил янги талқиндаги «Тоҳир ва Зуҳра» фильми суратга олинган. Мазкур картина аввалгисидан мусиқий комедия йўналишида эканлиги билан ажралиб туради. Унда Зуҳра ролини Паризода Бўрихўжаева исмли ёшгина қиз ижро этган.
— «Тоҳир ва Зуҳра» фильмида рол ижро этганимда 14-15 ёшда эдим. Кинога кириб келишим тасодифан юз берган. Ҳеч қачон актриса бўламан, деб ўйламасдим. У пайтгача бир нечта қўшиқ айтган эдим, шоу-бизнесга қизиқардим. Умуман олганда, санъат мен учун бегона эмасди. Отам Алишер Эшонхўжаев катта давлат байрамларида режиссёр бўлганлар. Шунинг учун ёшлигим саҳнада, студияда ўтган десам, муболаға бўлмайди. Шунинг учун санъат мени ўзига ром этган.
Саҳнага чиққанимда режиссёрлар мени кўриб, шу қиз тўғри келади, деб ўйлашган. Фильмга жуда катта кастинг бўлган. Лекин мен борган куним ўша куннинг ўзидаёқ бу ролга мени танлашган, — дейди Паризода Бўрихўжаева.
Аммо у фильмнинг мантиқий давоми ҳисобланган «Ада эмас, дада» фильмида Зуҳра ролини ижро этмаган. Бунга унинг съёмка бошланишидан бир неча кун аввал фарзандли бўлгани сабаб бўлган. Фильм режиссёри ролга модель қизлардан бирини таклиф этган.
Мавзуга доир:
- Таниқли турк актрисаси Фаҳрие Эвжен «Алп Арслон: Буюк салжуқий» тарихий сериалининг иккинчи мавсумида суратга тушмайди
- Оиласи учун карьерасида танаффус қилган Голливуд актрисалари (фото)
- «Бундай бўлишини ҳеч ким кутмаганди: «Муҳташам юз йил» сериали продюсери Марям Узерли жамоани ноқулай вазиятда қолдиргани ҳақида сўзлаб берди
Изоҳ (0)